Судот за човекови права во Стразбур денеска објави дека донел пресуда против Република Македонија со која едногласно ја прогласил жалбата на Јордан Митриновски, екс претседател на скопскиот Апелационен суд за допуштена и констатирал дека Судскиот совет не бил независен и непристрасен трибунал пред кој Митриновски немал фер судење“.
Пресудата била донесена на 7 април оваа година, а јавно беше објавена денеска.
Судот утврдил дека Јордан Митриновски бил разрешен во процедура која не обезбедила фер постапка, со што била сторена повреда на член 6 од Конвенцијата и му досудил 4 илјади евра нематеријална штета и 1.230 евра трошоци во постапката.
-Задоволен сум од пресудата, од тоа што правдата излезе на виделина и очекувам судот во Стразбур на ист начин да ги реши предметите и на другите судии кои беа разрешени на ист начин како мене- кратко изјави Јордан Митриновски.
Јордан Митриноски беше разрешен затоа што како претседател на Кривичен совет во Апелациониот суд во Скопје, со судиите Исмаил Лимани и Милка Стефкова донел одлука со која ја прифатиле жалбата на Бајруш Сејдии и му го замениле притворот со куќен притвор и со гаранција.
По барање на Јавниот обвинител, Врховниот суд во совет со кој претседавал Јово Вангеловски, го укинал решението за преиначување на мерката притвор и побарал разрешување на Јордан Митриновски.
Јово Вангеловски, во тоа време бил и член на Судскиот совет и гласал за неговото разрешување.
Судот во Стразбур, токму тука ја лоцирал повредата, бидејќи на овој начин не не било обезбедено фер и правично судење.
Во Стразбур, на одлучување чекаат и апликациите на судиите Виолета Дума, Мирослав Трифуновски, Иво Поповски, Гоце Јакшоски и Снежана Геровска Попчевска.
Судот во Стразбур не ги прифатил аргументите на македонската Влада дека судскиот совет е непристрасно и независно тело.
Македонската судијка во Стразбур Мирјана Лазарова Трајковска побарала изземање од овие предмети и на нејзино место била назначена судијката Ксенија Турковиќ.