Кривичниот суд ја одби молбата на екс премиерот Никола Груевски за одложување на затворската казна. Адвокатите на Груевски бараа тој да не замине на издржување на затворската казна на 8 ноември, поради пратенички обврски и обврските околу пишувањето на книга поврзана со неговиот докторат.
Во соопштението од Судот пишува дека „ судија за извршување санкции при Основниот Суд Скопје 1 – Скопје, постапувајќи по молба за одлагање на извршување на санкција определена со правосилна пресуда во предметот „Тенк“, донесе решение со кое ја одби молбата. Решението на судија за извршување санкции е испратено на странките во постапката.
По ова, Груевски има рок во наредните три дена да поднесе повторно жалба до Кривичниот совет, кој исто така има рок од три дена да одгоговори на жалбата.
Груевски е осуден на две години затвор за случајот „Тенк“ и според упатниот акт треба најдоцна до наредниот четврток на 8 ноември да се пријави во затворот Шутка.
Во меѓувреме, се чека одговор и за барањето кое го поднесоа адвокатите на Груевски за вонреден правен лек за преиспитување на пресудата за „Тенк“и Врховниот Суд да дозволи одложување на затворската казна, се додека не одлучи по вонредниот правен лек.
Како што пред два дена обајсни претседателот на Основниот суд Иван Џолев целата документација за предметот „Тенк“ е во Судот, затоа што течат рокови за редовен правен лек на Јанкуловска. Таа има рок до 6 ноември да одлучи дали ќе поднесе жалба до Апелацискиот суд, по што оригиналните списи од случајот ќе бидат испратени до Апелацискиот Суд, а фотокопиите до Врховен.
Во однос на барањето за одложување на затворската казна, Џолев објасни дека за ова може да одлучува и Првостепениот и Врховниот суд.
Претходно денеска координаторката на Независната пратеничка група од ВМРО-ДПМНЕ и коалицијата, Елизабета Канческа-Милевска денеска кажа дека осумтемина пратеници нема да гласаат за одземање на пратеничкиот мандат на Никола Груевски. Освен Канческа Милевска, во оваа група се пратениците Крсто Мукоски, Љубен Арнаудов, Сашо Василевски, Владанка Авировиќ, Зеќир Рамчиловиќ, Нола Исмајловска-Старова и Емилија Александрова.