Полска е осудена од Судот за човекови права во Стразбург затоа што им дозволила на ЦИА на полска територија да држат еден Палестинец и еден Саудиец нелегално затворени и врз нив да вршат тортура. Судот пресуди дека Варшава е виновна за двата случаи кои се однесуваат на соучество во нехуман и деградирачки третман, арбитрарно држење во затвор, нарушување на правото за приватен и семеен живот и нарушување на процедуралните права на двајцата луѓе.
Ова е втор пат една влада да биде прогласена за виновна во нелегалните активности на ЦИА во Европа. Претходниот случај е Македонија каде што, во 2012 година, земјата беше осудена да му исплати 60.000 евра на Германецот со либанско потекло Калед ел Масри.
Со оглед на тоа што лошиот третман и тортурата кои им биле вршени на двајцата осомничени терористи од страна на американските власти биле веќе познати во јавноста, Полска морала да знае дека, со дозволата ова да се врши на нејзина територија, се крши Конвенцијата за човекови права, се вели во пресудата.
Полска е осудена да им плати по 100.000 евра на двајцата оштетени.
Саудиецот Абд ал Рахим ал Наири е уапсен во Дубаи во октомври 2002 година како главен осомничен за атентатот на бродот УСС Кол во 2000 година каде загинаа 17 американски војници.
Палестинецот Заин ал Абидин Хусаин е уапсен во Пакистан во март 2002 година како еден од шефовите на Ал Каида.
Двајцата во моментов се во затворот Гвантанамо. И двајцата биле затворени во центарот на ЦИА во Полска каде што биле испрашувани под закани за егзекуција, давење, закани на сексуални напади врз нивните блиски и долго држење во позиција на стрес.
Полските власти одбија да го објаснат случајот повикувајќи се на тајната на истрагата. Европскиот суд смета дека одбивањето на Полска да даде елементи од доказите е нарушување на нејзините обврски. Освен тоа, Полска ги обезбедила сите услови за да се нарушуваат човековите права. Полска исто така им помогнала на ЦИА во трансферот кон Гватанамо.