Судксиот совет, по предлог на еден член од Советот, донел одлука да се отвори постапка за да се утврди дали има одговорност кај екс претседателот на Судот Владимир Панчевски, а во врска со злоупотребите на АКМИС – системот.
Според процедурата, Судскиот совет формирал комисија на известители која треба да собере докази и врз основа на тоа да достави Извештај дали имало несовесно и незаконско работење од страна на Панчевски.
Панчевски беше претседател на Кривичниот суд во период кога според Извештајот што го подготви независната комисија на Министерството за правда биле утврдени злоупотреби на АКМИС-от односно наместо електронски, предметите се делеле на судии на рака.
Освен во Кривичниот суд, оваа комисија утврди и злоупотреби на АКМИС – системот и во Врховниот суд но против претседателот на Врховниот суд Јово Вангеловски.
Извештајот на оваа комисија покажа дека 860 предмети не биле внесени во АКМИС-системот и за нив не бил одреден судија.
Конкретни предмети од еден судија се давале да ги работи друг судија, а честите промени во годишниот распоред значеле и ограничување кој судија ќе биде вклучен во автоматската распределба. Судии биле вадени од АКМИС по разни основи, само со параф на претседателот на судот.
Судиска солидарност или отсуство на политичка волја: Зошто нема одговорност за судиите
Вангеловски, заедно со поранешниот претседател на Кривичниот суд, Владимир Панчевски, беа повикани на распит во Јавното обвинителство за рачната распределба на предмети во Кривичниот и Врховниот суд, но една ипол година подоцна скандалот со АКМИС-системот е во предистрага и двајцата уште немаат статус на осомничени, бидејќи Обвинителството уште не отворило истрага.
Претседателот на Судскиот Совет Киро Здравев денеска пред почетокот на седницата рече дека за Вангеловски, против кого е отворена постапка пред Советот пред повеќе од една година, ќе се одлучува кога „комисијата ќе оцени и ќе го предаде Извештајот до Судскиот совет“. За Вангеловски и за уште двајца судии на Врховниот суд се води постапка за да се утврди дали имало одговорност кај нив кога одлучиле да го ослободат од притвор бизнисменот Сеад Кочан.
Министерката за правда Рената Дескоска вчера изјави дека никој не го штити Јово Вангеловски и дека Судскиот совет со новиот Закон сега има поголеми овластувања во утврдувањето на одговорност и разрешувања на судиите. Со новиот Закон за Судкси совет- соевтот може да покрене и постапка за разрешувања и на Претседател на Судот – ако се утврдат злоупотреби на АКМИС – системот.
„Ако мислите на извршната власт, не мислам дека има некој таков што би го штител (претседателот на Врховниот суд, Јово Вангеловски). Во Судскиот совет се води постапка за негово разрешување. Очекувам дека, и затоа е мојот апел, и судскиот совет да биде свесен за својата улога. Реформата можеме да ја направиме со предлагање на европски закони кои се пофалени од сите, но имплементацијата е на органите за кои ги носиме тие закони. Судскиот совет нема причина да бега од спроведување на законот, а сега веќе нема ни право, со сè што им е потпишано како јасни и прецизни основи и со воведување на принципот на одговорност и на самиот Судски совет“, рече Дескоска.
Новиот претседател на Судскиот совет денеска кажа дека Советот ја следи работата на сите судии и ако некој се огреши од Законот, ќе се покрене постапка.
Тој одговори и на критиките упатени од специјалната обвинителка Фатиме Фетаи која во интервју за 1ТВ побара смените да почнат токму од Вангеловски кој во неколку извештаи е наведен како кочничар на правдата .
„Ние одлучуваме по конкретно барање, неопходно е да се поднесе писмено барање со образложание за конкретен судија. Секој може да поднесе барање за утврдување на одговрност на судија, барањето треба да биде образложено, во него мора да биде наведено име и презиме на судијата, во кој суд работи да се даде опис на повредата, да се даде правниот основ на повредата и по поднесеното барање Советот формира комисија којашто го цени барањето од аспект на навременост и дозволеност. Такво барање може да поднесе и член на Судскиот совет, ако дојде по допрен глас и се соберат докази“, кажа денеска Здравев.
И покрај многуте извештаи во кои судии со имиња и презимиња беа посочени како одговорни за состојбите во судството, досега ниту еден судија не понесе одговорност.