Пратеничката група на СДСМ и коалициските партнери во Парламентот денеска поднесуваат барање за распуштање на Собранието, соопшти координаторот на пратеничката група на СДСМ Горан Сугарески.
– Како дел од политичките партии потписнички на Договорот од Пржино, ние пратениците сме должни да покажеме дека остануваме на договорените позиции што се во интерес на разрешување на политичката криза и овозможување достинствен живот за граѓаните на Република Македонија.
Секој обид за одлагање на распуштањето на Собранието од страна на мнозинството на ВМРО-ДПМНЕ и ДУИ, ќе биде доказ плус дека власта на Никола Груевски сака да избега од избори на 11 декември, рече Сугарески на прес конференцијата.
Тој истакна дека барањето е со назнака за одржување на итна седница, додавајќи дека опозицијата е за избори на 11 декември и бара веднаш да се свика итна седница на Собранието, бидејќи законските рокови за распишување на избори веќе течат.
Одговарајќи на новинарско прашање, што ќе биде со законите за СЈО, за заштитени сведоци, и со шестата изборна единица, Сугарески рече дека „за сите овие работи слободно нека дадат предлог коалиционите партнери, согласно мнозинството кое го имаат во ова Собрание, можат да стават на дневен ред уште денеска сите овие проблеми да бидат разрешени и до полноќ Собранието да биде распуштено“.
– Ова е она што со години го зборуваме дека сме за избори меѓутоа никогаш нема да дозволиме уште еднаш криминални избори да бидат организирани во Македонија како претходните неколку циклуси. Тоа нема да се случи. На 11 декември ќе има фер и демократски избори. Предизвикот е многу јасен – денеска даваме предлог за распуштање на Собранието. Почесна и почиста намера не може политичка партија да даде. Слободно, уште веднаш ги повикувам да се изјаснат од оваа говорница, да слеземе долу во пленарната сала и да го распуштиме Собранието, рече Сугарески.