Координаторот на пратеничката група на СДСМ Горан Сугарески денеска повторно ги обвини ВМРО ДПМНЕ дека бегаат од надзорната расправа за поплавите, чија прва седница се одржа пред 11 дена, и прават се таа да не продолжи бидејќи, како што рече „видоа дека вистината за нивната одговорност ќе исплива на површина“.
– Јасно е дека ВМРО-ДПМНЕ не сака никогаш да се одржи надзорната расправа, бидејќи не сака јавноста да ја дознае вистината. Токму затоа губи време обидувајќи се да ја смени досегашната прaктика за одржување надзорни расправи, во очекување дека ќе помине времето и ќе се распушти Парламентот, па ќе избегнат одговорност, изјави Сугарески на прес конференција.
Тој истакна дека надзорната расправа мора да продолжи, а „обвинетиот Груевски и неговите послушници мора да се појават и да одговорат како се случи во 21-от век да загинат најмалку 23 лица, меѓу кои и бебиња, поради немање канализација и неисчистени канали“.
– Тие ќе мора да ги објаснат сите пропусти во нивното 10 годишно владеење, што однесоа и човечки животи. На обвинетиот Груевски, како и на Никола Тодоров, Коце Трајановски, Тони Трајковски, Михаил Цветков, Владо Мисајловски, Зоран Јолевски, Митко Чавков, Жарко Караџовски, Оливер Ромески, Шабан Салиу, Ромео Тренов, Сузана Салиу, да им биде јасно – се појавиле на надзорната или не, одговорност ќе има, рече Сугарески.