Фондот за здравствено осигурување ја намалува цената за тестовите за Ковид во јавното здравство од 3600 денари на 2000 денари колку што ќе биде новата референтна цена, дознава НОВА. Оваа одлука Управниот одбор на ФЗО ја донел заради масовните тестирања и зголемениот обем на работа поради што и трошокот е помал.
Според информации од ФЗО цената на еден ПСР тест не изнесува повеќе од 20 евра. Ова за НОВА го потврди и директорот Миле Сугарев, кој потенцира дека одлуката на Управниот одбор чека на потпис на министерот Филипче.
“За масовните тестирања донесовме одлука за нова референтна цена која ќе биде околу 2000 денари. Цената на ПСР тестовите се намалува во јавното здравство бидејќи сега од есен не чека еден период кога ќе се прават уште помасовни тестирања.
Во вакви ситуации трошокот е под 20 евра, односно се движи од 675 до 920 денари по тест. На вработените кои за воља на вистината работат прекувремено нема да им се плаќа цена на труд по направен тест бидејќи тие земаат фиксна плата, а дополнителната работа им е израчуната во буџетот,“изјави за НОВА Миле Сугарев директор на ФЗО.
Тестовите пак, кои беа добиени преку донација нема да им се плаќаат, а како што вели Сугарев, вредноста на донациите ќе биде минусирана од вредноста на здравствените услуги.
Во однос на високите цени на тестовите за Ковид во приватните лаборатории и разликата со јавното здравство која сега уште повеќе ќе се продлабочи, Сугарев за НОВА потврди дека ниту 
една од приватните лаборатории досега не пројавила интерес да склучи договор со ФЗО.
Министерството за здравство на пет приватни лаборатории им дозволи влез во мрежата на јавни здравствени услуги и тие не само што не склучија договор со ФЗО, не се договорија ниту за унифицирани цени и сега владее шаренило од „напупмани“, и превисоки цени на тестовите за Ковид. Сугарев вели дека тие мора да склучат договор со ФЗО штом имаат влез во мрежата.
„Во нормални околности, штом добијат влез во мрежата, тие даваат понуди до Фондот. Ова значи, дека мора да склучат договор со ФЗО“, вели Сугарев, за НОВА.
Очигледно е дека во вакви околности, приватниците ги интересира само профитот. Добро упатени извори за НОВА велат дека Министертсвото за здравство кое им дозволило влез во мрежата со тоа што прават тестирања за јавното здравство треба да стави ред во цените. Тоа морало и требало да се направи кога беше прогласена вонредна состојба во државата.
„Мора да стават ред приватните лаборатории ако сакаат да работат за јавното здравство. Министерството за здравство може и има право да ги викне и да им соопшти дека мора се вклопат во ситуацијата и дека не може да прават профит во време на пандемија. Во краен случај тоа може да го направи и Парламентот со измена на законската регулатива“, потенцираат нашите извори.
Лекарски извори потенцираат дека приватниците ја користат можноста бидејќи јавното здравство нема доволно капацитети. Тие велат дека доколку во јавното здравство се набават неколку апарати за тие што сакаат да се тестираат приватно, а на тестовите им се стави реална цена, тогаш приватните лаборатории ќе отпаднат.