Шеесет и деветгодишниот Благоја Боцевски од Скопје пред 11 години заболел од рак на дојка, малигна болест која не ги одминува и мажите. Со навремена реакција успеал да се излекува и сега одлучи да ја сподели својата приказна со јавноста.
„Пред 11 години ми се појави грутка на левата града, која кога се јавив на преглед се покажа дека е малигна. Следуваше операција, па зрачење, пет години примав цитостатици. Имав среќа што се јавив на време и болеста не беше во одминат стадиум. На почеток имав страв да зборувам за мојата болест, но сфатив дека подобро се чувствувам ако зборувам и дека така сум и општествено одговорен“, ја започна својата приказна, за првпат пред јавноста, Благоја Боцевски пензионер, кој порано работел во одделот за телекомоуникации во МВР.
Благоја успеал да се избори со тешката болест со голема поддршка од лекарите, семејството, а подоцна и од здружението„Борка-за секој нов ден“ каде добивал психолошка поддршка и едукација.
„ Сега сум здрав човек, но апелирам до надлежните во здравството, да воведат скриниг за рак на дојка и кај мажите, исто како кај жените бидејќи оваа болест не ги одминува и мажите“, рече Боцевски.
Во С. Македонија 8 до 10 мажи годишно заболуваат од рак на дојка, што е 1 -2 проценти од машката популација. Така е и во светски рамки. Дека и мажи заболуваат од оваа опака болест досега не се знаеше доволно во јавноста.
Во државата има заболени и починати пациенти со карцином кои се заразиле со Ковид, но дневно од малигни заболувања умираат 13 до 15 луѓе, изјави Биба Додева претседателка на здружението „Борка-за секој нов ден “кое работи и со пациентите и со институциите.
„Тоа е огромна бројка и заради тоа сметаме дека здравството не треба да прекине и затоа сите иницијативи од самиот почеток што ги правиме дека треба да се овозможат навремен прегледи за болните, да продолжат дијагностичките прегледи, се работи за малигна болест која може брзо да напредува. Правиме напори и во помалите градови затоа што видовме дека некои клиники не функционираат.
Покренавме иницијативи со Министерството и клиниките, за тоа дека мора да продолжат дијагностичките процедури и дека мора да има лекување. Помагаме во во дистрибуција на лекови со помош на Црвен крст за да не морат луѓето да доаѓаат во Скопје. Не смее да ни колабира здравствениот систем заради оваа ситуација, рече Биба Додева, претседателката на „Борка – за секој нов ден“
Здружението во недела организира настан „Race for the cure„ во рамките на Националната кампања за борба против рак на дојка, кој ќе се одржи во Градски Парк, кај Школка и во уште 13 градови низ Македонија истовремено.
„Ова ќе биде нашата 12-та „Напред розово“ која што оваа година преминува во „Race for the cure„ заедно со уште 36 други земји и организации во Европа. Многу сме среќни бидејќи по прв пат ја ставаме Македонија на мапата на Европа во едно такво големо семејство, но исто така сме среќни што успеавме во време на Ковид да не ги заборавиме болните од рак, да инсистираме за нивна грижа, затоа што Ковидот ќе помине, меѓутоа ракот ќе остане, особено ракот на дојка кој е еден од најчестите видови на рак кај жените, но и кај мажите, рече Додева.
Покрај во Скопје настани истовремено ќе се одржуваат и во Битола, Охрид, Прилеп, Ресен, Кавадарци, Велес, Струмица, Гевгелија, Валандово, Тетово, Гостивар, Дебар, Колани и Виница, со ангажманот на подружниците на „Борка“ во тие градови, како и мобилизација на градоначаланиците во општините и жените во сите тие места.
Лук Захнер советник за односи со јавност во Амасадата на САД во Република Северна Македонија, која од самите почетоци ги поддржува во континуитет активностите на „Борка“, истакна дека оваа тема е универзална, и на некој начин ги допира сите луѓе низ целиот свет и токму затоа здружението ја има поддршката на Амбасадата за подигање на јавната свест за оваа подмолна болест.
“Се надевам дека сите ќе се придружите на „Борка“ и на тимот на Амбасадата во недела да чекориме заедно во чест на сите кои ги изгубија животите и во поддршката на семејставата, пријателите, докторите, истражувачите и на заедницата, рече Лук кој пренесе и лично искуство за средбата со болеста.
Што се однесува до отсуствата од работа заради хорнична болест, засега нема проблем кај болните од карцином за добивање на потврди и извештаи. Не сме добиле ниту една поплака,рече Додева.