Требаше да се извините на граѓаните што ширевте лаги и небулози, што го поделивте општеството, ако имавте грам чест и морал, засрамете се, вие сте предавници! Нервозни сте затоа што нема бугаризација, затоа што имаме чист македонски јазик, без фусности, без забелешки. Македонци кои говорат македонски јазик во ЕУ. Колку тоа гордо звучи, порача пратеникот на СДСМ, Марин Костовски.
По говорот на Рашела Мизрахи, пратеничка од ВМРО-ДПМНЕ, собранискиот спикер Талат Џафери ја прекина денешната собраниска седница, на чиј дневен ред беше информацијата од Владата за францускиот предлог – преговарачка рамка за ЕУ. Седницата се одвиваше во многу тензична атмосфера, обраќањето на премиериот Ковачевски беше проследено со свирежи од вувузели. Како што соопшти Џафери, расправата продолжува утре во 11часот, а за збор се пријавени 42 пратеници.
Со 68 гласа „за“ и „38“ против, Собранието го усвои дневниот ред на денешната 81. седница со единствена точка на дневниот ред – разгледувањето на Информацијата за содржината на Предлог преговарачката рамка за пристапните преговори на Република Северна Македонија со Европската унија, предложена од страна на Претседателството на Франција со Советот на Европската унија на 30 јуни 2022 година.
Пратениците од опозицијата од собраниската говорница обвинија за, како што нагласија, предавство на македонскиот народ и за негрижата на македонското малцинство во Република Бугарија.
Мизрахи запраша: „Кога народот ќе каже не тоа значи точка на се. Дали рушевте антиквизација за да ја замените со бугаризација“. Таа во знак на револт го искина документот со објаснување за францускиот предлог, а претходно од говорница документот го запали нејзиниот сопартиец, Јован Јаулевски. Претседателот Џафери го опомена со зборовите „не си свесен што си направил, ќе одмориш и ќе сфатиш што си направил“!
Каевски: Кукавици сте, се криете зад Левица и заедно со нив одработувате за туѓи центри на моќ!
Пратеникот на СДСМ, Дарко Каевски, побара одговор од пратеникот од ВМРО-ДПМНЕ, Драган Ковачки да каже која е неговата поврзаност со луѓето со качулки на протестите и дали координирал поранешни припадници на Армијата во црните и крвави сценарија.
Тој упати сериозни закани кон премиерот Ковачевски и рече дека не го признава, а дека избегал од собраниската сала.
– Ќе скапеш, ќе скапеш, во затвор. Може до утре сабајле да се смеете, ние ова ќе го реализираме, нагласи Ковачки, кој исто така се обиде да го запали документот со францускиот предлог, но не успеа, запалката му закажа, па на крајот го искина документот.
Иванка Василевска од ВМРО-ДПМНЕ рече дека болна точка за Бугарија е фактот што Атина го прифаќа постоењето на македонскиот јазик, а тие го нарекуваат „дијалект на бугарскиот јазик“.
– Многу е чудно како Софија се согласи да бидеме членка на НАТО, а во втората половина на 2019 година да стане пречка за интеграција во ЕУ. Во преден план се сега барањата за внесување на Бугарите во нашиот Устав, а не се признава македонско национално малцинство кај нив. Бугарија прва ја призна македонската држава, но не го призна македонскиот народ и јазик, нагласи Василевска.
Пратеничката Снежана Калевска Ванчева од СДСМ порача „денеска е денот кога сите лаги и манипулации паднаа во вода, денеска е денот кога ВМРО-ДПМНЕ треба конечно да излезе и да им се извини на граѓаните за нивната лага и манипулација“.
– Урсула Фон дер Лаен денеска во македонското Собрание јасно и гласно кажа нема сомнеж дека македонскиот јазик е наш јазик, чист и заштитен, лага и манипулација е дека македонскиот јазик ќе стане бугарски дијалект, лага е дека Македонците ќе го изгубат својот идентитет со преговарачката рамка, нашиот идентитет и нашиот јазик не биле изгубени низ векови, Ние сме Македонци со наш македонски јазик и такви ќе останеме и такви ќе влеземе во ЕУ, истакна Калеска Вначева.
Пратеникот Павле Трајанов од ДС реплицираше дека тој е за една меѓувладина конференција со која ќе почнат преговорите, а потоа да се отвораат кластерите.
Костовски: Нервозни сте затоа што нема бугаризација, затоа што имаме чист македонски јазик!
Пратеникот на СДСМ, Марин Костовски, кој дојде со знамето на ЕУ коешто го рашири на говорницата, па доби аплауз од сопартијците, истакна дека по денешната шлаканица што ја добија во македонското Собрание, „криминалците од ВМРО-ДПМНЕ кои го бранат Никола Груевски се нервозни“, бидејќи имаме чист македонски јазик во ЕУ и затоа се нервозни и свират.
– Требаше да се извините на граѓаните што ширевте лаги и небулози, што го поделивте општеството, ако имавте грам чест и морал, засрамете се, вие сте предавници! Нервозни сте затоа што нема бугаризација, затоа што имаме чист македонски јазик, без фусности, без забелешки. Македонци кои говорат македонски јазик во ЕУ. Колку тоа гордо звучи, порача пратеникот на СДСМ, Марин Костовски.
На денешната собраниска седница и претходеше седницата на која свое обраќање имаше претседателката на ЕК, Урсула фон дер Лајен.
По завршувањето на седницата, пратениците од ВМРО-ДПМНЕ, по излегување од Собранието, им се придружија на граѓаните кои денеска протестираа. Предмалку, протестот и официјално заврши.
Како што информираа од МВР, петмина се приведени за време на денешните протести.
(Љ,Б.)