Ова не беа избори во Германија, туку беа катастрофални избори на кои на студенти им беа одземани индекси и беа уценувани дека ако не го активираат цело семејство да гласа за ДУИ, нема никогаш да положат, потоа ослободуваа криминалци од затвор и поткупуваа гласачи, вели лидерот на ДПА, Мендух Тачи, во интервјуто за Дневник, во кое не штеди критики, па и тешки навреди и за своите политички противници од ДУИ, но и за гласачите.
– Супер што изгубивме во Тетово оти мислам дека ова повеќе нема да им овозможува на тетовци да бидат лицемерни. Тетовци имаа едно образложение зошто да не гласаат за мене и за Сади Беџети, но имаа стотина причини да не гласаат за Али Ахмети и за Теута Арифи. Арифи е внука на познатиот удбаш од Тетово, такви се и Фатмир Бесими и Ахмети. Албанците од Тетово се продадоа, некои за да ги заштитат работните места, некои за 500 денари. Брзо ќе сфатат дека не изгубила само партијата, туку и тие. Ако сакаа мене да ми се одмаздат, не го прифаќам тоа. На дел од нив им порачувам дека се предавници, поткупени души и оти немаат врска со никаков морал. Во сите општини освоивме двапати повеќе гласови, само во Тетово сме во минус 1.000 гласа. Ќе инвестирам да им биде што е можно полошо, неиздржливо. Секое утро кога ќе пијат вода, да им биде како отров. Секој ден кога ќе се видат во огледало, да си речат дека се продадени души, дека се предавници.
Но, за Тачи ни ова не е доволно, па тој продолжува со уште потешки зборови.
– Горд сум што успеав за мене да гласаат 13.700 Албанци од Тетово што се чесни. Одговарам само пред нив, другите ги сметам за ѓубре на мојата нација. Инвестирам во младите што се на наша страна.
За својата оставка, која не беше прифатена од пратијата, вели дека била само мамка за
„дволичните Албанци“ што гласале против ДПА.
– Малку да се пошегувам со нив. Апсолутно не чувствувам никаква одговорност кон тие што се продадоа, а тоа се Албанците од Тетово, кои гласаа за Ахмети без никаква причина.
За последните активности на Ахмети во однос на решавањето на проблемот со името, пак, Тачи вели дека тој сака да направи нова перцепција за себе, но не успева.
– Тој му е слуга на Никола Груевски и тоа ќе остане. Трагикомично е што сака да ги убеди Албанците дека нешто зависи од него кога станува збор за прашањето за името. Тоа е чиста лага. Ништо не зависи ни од него ни од мене кога станува збор за името. Решавањето на тоа прашање зависи од ВМРО-ДПМНЕ и од СДСМ.
Во однос на изјавите на Ахмети во кои тој вели дека трпението на Албанците е при крај, Тачи повикува никој да не се плаши од овие закани.
– Бараме да бидеме во процесот на интеграција во ЕУ и во НАТО. Истовремено бараме да нѐ слушате за нашите барања, за кои сме убедени дека нѐ водат напред сите. Заканите на Ахмети дека Албанците немаат трпение се смешни.