Ден по завршувањето на првиот круг на претседателските избори ДПА синоќа во скопско Кондово продолжи со кампањата за Парламентарните Избори, промовирајќи ги кандидатите за пратеници.
Лидерот на ДПА Мендух Тачи пред присутните ги коментираше и резултатите од првиот круг на претседателските избори истакнувајќи дека на 27 Април 40.000 гласови на ДПА ќе станат 120 илјади бидејќи,како што рече,од притисоците и заканите гласачите на ДПА не можеле со себе да ги носат на гласање членовите од потесното семејство.
„Дали вие знаете дека кога го снимаш и евидентираш човекот додека се обидува да ја искаже слободната волја преку гласање сте направиле потешко дело одошто нацистите кога ги стигматизираа евреите. Ќе одговарате за сета проливена крв кај албанците и за сите уништени нивни домови. Ние сме спремни да се соочуваме со вас со демократски норми но,видовме во недела, дека вие газите врз овие норми“, порача лидерот на ДПА Мендух Тачи.
Тачи исто така потенцираше дека бојкотот на ДУИ не бил успешен.
„Успешен бојкот беше тој во 2009. година кога ДПА го бојкотираше “таткото” на Али Ахмети,Ѓорге Иванов и ние успеавме од Сарај-скопско до Речане-гостиварско “таткото” на Али Ахмети да добие 1.7% гласови”, рече Тачи.
Тачи презентираше и дел од Програма на ДПА за овие избори.
„Нашата програма е Македонија да има дводомен парламент. Македонија мора да прифати да од буџетот на државата 35% да одат за албанците. Македонија мора да прифати албанскиот јазик да биде службен јазик.Македонија во текот на годината мора да изнајде решение за името за да добиеме членство во НАТО и ЕУ”, рече Тачи на митингот на ДПА во Кондово.