Лидерот на ДПА, Мендух Тачи вели наредната недела ќе биде постигнат договор за излез од политичката криза. Неговата изјава доаѓа по денешната средба со американскиот конгресмен Елиот Енџел во Собранието.
Тачи открива дека паралелно со преговорите за излез од кризата, се разговарало и за прашањето за името.
– Има некакви предлози за кои се разговара, но каков е тој предлог тоа треба друг да го каже, изјави Тачи.
Во однос на решението на кризата, лидерот на ДПА вели неговата партија е заинтересирана да биде во институциите по договорот.
– Не верувам дека ќе се чека Викторија Нуланд за да се реши кризата, затоа што на тој начин ќе се девалвира процесот што го почна ЕУ. Верувам дека наредната недела ќе се дојде до решение. ДПА не е заинтересирана за преодна, политичка, концентрациона влада. Ние сме заинтересирани да учествуваме во институциите на системот за да се дојде до организирање на фер и демократски избори. ДУИ е веќе демаскирана како неутрален чинител во овие преговори за надминување на политичката криза. Тоа им е јасно и на сите во Брисел, изјави Тачи.