Поранешната главна преговарачка на Косово во дијалогот со Србија, Едита Тахири вели дека актуелниот косовски премиер, Албин Курти „нема потреба да се урива“, затоа што „самиот паѓа“, јави дописникот на МИА од Приштина.
Во објава на нејзината страница на Фејсбук, по повод барањата упатени до Курти од страна на ЕУ и САД за преземање мерки за деескалација на состојбата во северно Косово, Тахири вели дека косовскиот премиер е „во потрага по излез од ќор-сокакот што самиот го создаде“.
По забелешките што му ги упатија на Курти претставниците на ЕУ и САД во врска со неговите дејствија во северно Косово, каде што тамошните Срби протестираат против градоначалниците Албанци, Тахири изјави дека Курти „успеа да наштети на стратешкото сојузништво на Косово со САД“ и дека „ова е првпат Косово да има лидер кој е антиамериканец“.
– Од неговото антиамериканство до неговото донкихотство, Албин Курти успеа да му наштети на стратешкото сојузништво на Косово со Америка! Косово е отворено казнето од САД, изјави Тахири откако пред неколку дена официјален Вашингтон го исклучи Косово од военат вежба „Бранител на Европа 2023“ и најави нови санкции доколку Курти не ги исполни барањата за преземање дејствија за смирување на состојбата во северно Косово.