Во рамките на научно-стручниот собир на тема „Функционирањето на безбедносниот систем на Република Македонија во кризна и сложена безбедносна состјба“, доц. д-р Марјан Ѓуровски потсети дека тајните служби во земјата мора да бидат под надзор на граѓаните.
Како што вели тој, потребно е рестирање на безбедносниот систем на Република Македонија со оглед на тоа што дел од системот во моментов е на „апарати за вештачко дишење“.
– Дел од системот во моментов е на „апарати за вештачко дишење“. Суштинска е потребата од редефинирање на дел од институциите врз основа на седум столбови кои ќе обезбедат консолидација на ресурсите, ажурирање на безбедносната политика и ризици, професионализација, донесување на закон за интегрална безбедност, односно создавање на безбедносна заедница, изјави Ѓуровски во рамките на конференцијата.
Тој потенцираше дека во изминатите 25 години, меѓу дугото, рак на македонската демократија е недостатокот од демократска и цивилна контрола на тајните разузнавачки служби.
– Со оглед на тоа што тајните безбедносни служби се скапа алатка во рацете на политичките елити, нужна е безбедносна контрола на сите вработени во разузнавачките и контраразузнавачките служби и формирање на граѓански совет со зголемени ингеренции во рамките на Собранието со цел да имаме јасна и демократска контрола на службите и нивно обединување за да бидеме функционална демократија и да немаме злоупотреби на основните човекови права, ургира Д-р Ѓуровски.
Одговарајќи на новинарско прашање на НОВА, дали е дозволиво да се набавуваат опреми од страна на тајните служби под закрила на “класифициран документ“, како што е случајот со ФинФишер софтверот, Ѓуровски одговара дека транспарентноста е клучна во вакви случаи.
– Транспарентноста е основен елемент во работењето на безбедносниот систем и опремата (ФинФишер) и опремата за модернизација на АРМ се за поздравување, но тоа треба да се одвива транспарентно пред се и под граѓански надзор, во спротивно, имаме опасност од злоупотреби, предупредува тој.
На денешната конференција присуствуваше и министерот за внатрешни работи, Оливер Спасовски кој во својот говор порача денес не постои дел или делови од општеството кои не се предмет на закана и дека токму тоа треба да биде основен постулат во градењето и надградбата на безбедносниот систем.
– Државата мора да биде заштитена. Се разбира не од граѓаните, туку во интерес на граѓаните кои се смисолот за постоење на државата, рече Спасовски.
Спасовски порача дека институциите мора да се фокусираат кон натамошна изградба на флексибилен, ефикасен, технички модернизиран концепт на безбедност на институционално ниво, способен првенствено за валидно евидентирање, анализа и проценување на заканите, како и на мултиинституционален систем за соодветен одговор кон истите, притоа почитувајќи ги автохтоните карактеристики и националните приоритети, но и нужноста за стандардизирање на сите сегменти од безбедносната сфера.