Од СДСМ објавија видео на кое се гледа кандидатот за градоначалник на Кисела Вода од ВМРО ДПМНЕ, Јохан Тарчуловски како им ветува проекти на граѓаните од Припор и Драчево, на сметка на граѓаните од Пржино и Црниче, за време на собир во рамки на предизборната кампања.
На видеото се слуша како Тарчуловски вели дека Припор и Драчево се главните места кои очекува да го донесат на власт и дека кон нив чувствува одговорност, а не кон Пржино и Црниче кои според него не го поддржувале.
-Пржино, Црниче се 90 посто против мене и тој не ти отвара ни врата, те плука од прозор, да ме тера некој да му правам одвод и канализации, а ти немаш овде ни струја, ни вода. Е не може така. Има ред, прво ќе почне тој што заслужил, тој што донел најмногу гласови, на тој ќе му се направи. Е после ќе видиме дали има нешто за другиот или ќе нема. Ќе си чекаш ти ребаланс кога ќе дојде редот – се слуша како вели Тарчуловски во видеото.
-Тарчуловски, јавно и без срам кажа дека се кандидира само за да ги дели и дискриминира граѓаните. Тарчуловски ќе работи само онаму каде што гласале за него, а другите ќе ги игнорирал оти немале заслужено. Тарчуловски призна дека за граѓаните на Црниче и Пржино нема канализации, улици и водоводи затоа што немало да гласаат за него. Ова е удар врз граѓаните од Тарлуловски, кој е човек кој дели и се одмаздува – рече Сашо Мержаноски кој е дел од изборниот штаб на кандидатот за градоначалник на Кисела Вода од СДСМ.
Според Мержаноски, ваквиот став на Тарчуловски е само уште еден доказ за тоа како ВМРО-ДПМНЕ функционирало и дека се уште е заробено во старата ера.
-ВМРО-ДПМНЕ и Тарчуловски, не само што не можат да излезат од политиките на поделби, протекции, непотизам со кои владееа 11 години, туку отворено кажуваат дека така ќе продолжат и во иднина – вели Мержаноски.
Од ВМРО ДПМНЕ реагираат дека видеото е целосно извадено од контекст.
– Нути една манипулација, изјава извадена од контекст, местенка и лага не може да го спаси СДСМ од огромниот пораз кој ги очекува. СДСМ знаат дека ќе иззгубат убедливо како во општина Кисела Вода, така и во другите општини низ Република Македонија. СДСМ свесни дека на претстојните локални избори ќе доживеат огромен дебакл се обидуваат со изјави извадени од контекст да ја замајуваат јавноста – пишува во нивната реакција.