Драмскиот дел од програмата на „Охридско лето 2013“ продолжува утревечер со настап на Народниот театар од Битола, кој пред охридската публика ќе ја изведе претставата „Тартиф“ од Молиер, во режија на Сашо Миленковски.
Согласно фестивалската програма, предвидено беше Битолскиот театар на „Охридско лето“ да настапи со претставата „Хамлет машина“, меѓутоа до измената дојде поради објективни причини односно неможност на актерката Илина Чоревска да настапува.
„Тартиф“ ќе се игра на претходно предвидената сцена, во Големата сала на Центарот за култура „Григор Прличев“ каде требаше да се игра и „Хамлет машина“.
Според надлежните од управата на „Охридско лето“, промената на програмата нема да предизвика никави финансиски последици, буџетот за новата претстава е ист додека сценско – техничките услови ќе бидат навреме исполнети, заедно со маркетиншките материјали кои ќе бидат готови до понеделник.