Претседателката на „Транспаренси интернешнл – Македонија“, Слаѓана Тасева вели дека не е примерно што лидерот на СДСМ Зоран Заев ќе се соочи со премиерот Никола Груевски на суд за клевета за случајот „Македонска банка“ пред воопшто обвинителството да ги истражи наодите за корупција кои ги изнесе Заев. На денешната пресконференција таа се осврна и на Законот за заштита од корупција и членот 19 кој што, според Тасева, го овозможува правото на дојавувачот на корупција прво да се спроведе истрага, наместо веднаш да се суди за клевета.
-Конкретниот член вели дека не може да се преземе казнено гонење или да се повика на каква и да е друга одговорност лице што открило податоци што укажуваат на постоење на корупција, вели Тасева.
Таа потенцираше дека овој закон има големи слабости и е неефикасен бидејќи „иако определува заштита за дојавувачите на корупција, не ја определува процедурата во која таа заштита би се спровела“.
Слаѓана Тасева го критикува и новиот нацрт-закон за заштита на дојавувачите на корупција. Според неа, слабост на овој закон кој е спротивен на меѓународните конвенции е тоа што единствено е предвидена заштита за дојавувачите од јавниот сектор, но не и за оние од приватниот и единствено доколку дојавуачот ги пријави своите наоди пред Антикорупциската комисија, но не и преку медиумите или други средства.
Тасева истакна дека праксата во Македонија покажала дека дојавувачите не само што не се штитат, туку, напротив, на крајот многу често против нив се водат исцрпувачки судски процеси за клевети.
НОВА подготви видео сторија која прикажува некои од судбините на Македонците кои пријавиле корупција, како човекот кој своевремено ја откри аферата „Телеком“ која доби судска завршница дури и во судот во Њујорк, но во Македонија, единствениот судски епилог беше оној против дојавувачот во процес за клевета.