Лидерот на Лабуристите Ед Милибенд и лидерот на Ториевците Дејвид Камерон
Лидерот на британските Лабуристи, Ед Милибенд откако беше избран за прв човек на партијата беше во сенка на прашањето „Дали неговиот похаризматичен брат ќе беше подобар лидер“. Во синоќешната прва ТВ дебата за претстојните избори, сепак како што проценуваат британските медиуми, тој бил подобар пред премиерот и лидер на Ториевците Дејвид Камерон.
Следните избори во Велика Британија за новиот парламентарен состав се закажани за 7.мај 2015 година, каде што ќе се избира 56.Парламент во Велика Британија.
Веќе се воспоставени датите за традиционалните ТВ дебати, во кои седуммина лидери на партии ќе земат учество.
По вчерашната, следната дебата е закажана за 2.април во која сите седум лидери ќе дебатираат, додека на 16.април, ќе се одржи дебатата со петмината лидери на опозициски партии.
На 30.април е завршната на која заедно со Камерон дебатираат и лидерот на Лабуристите Ед Милибенд како и лидерот на Либералдемократите Ник Клег, кој воедно е и заменик-премиер во Британија.
Ник Клег
Од синоќешната дебата, ова се петте работи кои британски „Телеграф“ ги забележува:
1. Џереми Паксмен се враќа
По повеќе од една година во сенка, и од време на време “уловен” на риболов за време на неговиот одмор, публиката забележа еден победник од синоќешната ТВ-дебата, а тоа е новинарот Џереми Паксмен.
За време на дебатата и двајцата политички лидери Дејвид Камерон и Ед Милибенд искусија потешкотии за време на прашањата на еден од “најопасните” во медиумскиот простор. Камерон тешко одговараше на директните прашања за неговиот учинок во последните пет години како Премиер. За Милибенд, прашањата повеќе беа лични.
„Работата е што те гледаат како ексцентрик од Северен Лондон“, рече Паксмен за лидерот на Лабуристичката партија, посочувајќи на анегдотата дека Владимир Путин го избришал подот со Милибенд.
2. Ед Милибенд се запали
Соочен со остриот Паксмен, Ед Милибенд се обиде да се однесува слично. Паксмен сугерираше дека Путин би го расцепил лидерот на Лабуристите “на парчиња”.
„Дали сте доволно цврст“, праша новинарот. „По ѓаволите, секако дека сум“, возврати Милибенд, фалејќи се потоа дека му пркосел на американскиот претседател Барак Обама за прашањето за Сирија. Паксмен на крајот интервјуто го заврши со прашањето „Дали сте во ред?“
Милибенд одговори: „Да, а вие?“.
3. Дејвид Камерон е ранлив на нападите за прекршување на ветеното
По пет години на премиерската функција, Премиерот е благ со медиумите. Еден од најинтересните аспекти од минатата вечер беше што, покрај тоа што Камерон во кампањата за следните избори се натпреварува со пораката „Погледнете што имам направено“, сега се соочи со прашања за неостварените ветувања.
Во однос на долгот, Камерон беше прашан зошто дефицитот не бил искоренет, а дополнително не успеа да каже колку точно овој Парламент позајмил. Додека за имиграцијата, Премиерот призна дека Ториевците драстично ја промашиле својата цел за податоците за годишна нето миграција.
4. Сенката на старото раководство виси над Милибенд
Во еден момент се чинеше дека Милибенд е подготвен да прифати се што ќе произлезе од прашањата на Паксмен за неговите претходници.
Неуспесите на Лабуристите, потенцираше Милибенд, се токму главната причина зошто тој а не неговиот брат бил подобар избор за лидер на партијата.
5. Имиграцијата е Ахилова пета и за Лабуристите и за Ториевците
Додека Камерон и Милибенд беа во фокусот на дебатата, во позадина се појави и лидерот на Британската партија за независност Најџел Фериџ. Веројатно се радуваше на одговорите на кои и двајцата неумешно одговараа.
Најпрво Камерон призна дека не успеал да ја достигне целта и да ја намали имиграцијата на “десетици илјади”, додека Милибенд не успеа да ја каже бројката на која цели тој.
Не би било зачудувачки доколку Фериџ се обиде во наредниот период да ја пополни таа празнина.