Серж Лариве, авторот на текстот и вработен во секторот за психоедукација во Универзитетот тврди дека беатификацијата на Мајка Тереза во 2003 е незаслужена и се заснова на лаги од страна на Ватикан.
“Темните страни на Мајка Тереза„ е насловот на текстот на тројца канадски автори, предводени од Лариве, и вклучува над 500 прочитани биографии и текстови за животот на најславната Скопјанка. Заклучоците на авторите се застрашувачки, опишуваат жена која прифаќала пари од диктатори, била строго против разводот и абортусот и ги оставала болните да страдаат во нејзините домови, во кои хигиенските услови биле често лоши.
“Во нејзините каритативни центри, пациентите биле оставани сами на себе, добиваа многу малку палијативна нега или лекови против болка, затоа што Мајка Тереза сметала дека страдањето ќе ги доближи до Господ“, раскажува Серж Лариве.
Мајка Тереза отвори вкупно 507 мисии за сиромашни и болни во стотици земји. Нејзината фондација ја поддржуваа познати милионери и политичари, како Лејди Дајана или Бил Клинтон. Но добивала пари и од поматни места, тврди текстот. Како на пример поранешниот диктатор на Хаити, Жан Клод Дивалие. “Еден човек и поклони приватен џет“, раскажува Лариве, “ и повеќе од милион долари, украдени од пензиски приватни фондови на мали штедачи во САД. Кога дојде време да му се суди на тој човек, таа напиша писмо во негова одбрана.“
На морален план, Мајка Тереза била конзервативна. До тој степен што “се противела на абортус за босанските жени жртви на силувања од српските војници“, тврди Лариве.
“Објаснете ми како може ваква жена да добие Нобелова награда за мир?“, прашува тој во интервју со канадски медиуми.
И тоа не е се. Истражувачите тврдат дека дошле до сознанија дека “чудото“ кое овозможило Ватикан да ја прогласи за светица, бил чиста лага.
“Религиозните сестри каде беше третирана жената со страшни болки во абодменот, ја потплатија за да каже дека Мајка Тереза и ги излечила болките. Жената беше излечена од лекарите во болницата!“, додава Лариве. Авторите ја отвораат конечно дебатата за тоа дали имиџот и легендата на Мајка Тереза беа всушност “маркетиншки“ трик на Ватикан за да се ревитализира Црквата. Серж Лариве поставува уште едно прашање за крај:
“Каде се сите милиони долари собрани за нејзината фондација? Според текстовите кои ги консултиравме, тие пари требаше да се искористат за градење на куќи за сестрите кои работеа во нејзините болници, или директно во Ватикан.“
По медиумската бура предизвикана од овој труд во Канада, се огласи и самиот декан на теолошкиот факултет на Универзитетот во Монтреал, Жан Клод Бретон, кој смета дека авторите кои работеле на овој текст се “компентентни за работата која ја направија“.
“Овој труд е многу подобар од сликата за нив што ја шират медиумите. Прашањата што ги поставуваат за ликот и делото на Мајка Тереза, се прашања кои одамна циркулираат“. Смета деканот на теолошкиот факултет во Монтреал.
Бурите во католичката црква очигледно нема наскоро да стивнат…