Марија Шарапова остана без вајлд карта за Ролан Гарос. Русинката поднесе барање за настап на вториот годинашен гренслем што беше одбиено по неколку неделно разгледување на случајот од Француската тениска асоцијација (ФФТ). Образложението е дека се враќа на терен по допинг скандалот и двегодишната суспензијата што во меѓувреме беше намалена на 15 месеци.
„Специјалните покани се издаваат на некој кој се враќа на терен по повреда, но не и по допинг случај. Можеби во моментот има многу разочарани меѓутоа моја одговорност е да го штитам тенисот и играта без никакви сомнежи и резултати“, истакна Бернар Жудичели, претседател на ФФТ.
Поранешниот светски рекет број еден кај дамите има две титули на Ролан Гарос во кариерата. Првата ја освои во 2012 година, успех што го повтори и во 2014 година. Моментно се наоѓа на 211 место на ВТА листата, но на првиот гренслем настап по паузата ќе мора да почека барем до Вимблдон.
„Вајлд карта за квалификации би била навреда и за неа и за турнирот“, додаде Жудичели кој нагласи дека трипати ја барал Шарапова да ја запознае со одлуката пред да ја објави на Фејсбук, но Русинката не се јавувала на телефон.
Несогласување со одлуката на француските тениски авторитети изрази Стив Сајмон, прв човек на Женската тениска асоцијација (ВТА), кој застана во одбрана на Шарапова.
„Таа ја одработи својата казна и не можам да ја поддржам одлуката да не добие специјална покана. Не постојат основи за казнување надвор од санкциите на конечните одлуки по ова прашање“, изјави Сајмон.
Претходно во пресрет на Марија Шарапова излегоа организаторите на турнирите во Штутгарт, во Мадрид и во Рим, но не и на Ролан Гарос.