Сметаме дека одредени изјави од Косово се упатени на сосема погрешна адреса, велат од кабинетот на претседателот Ѓорѓе Иванов по изјавата на шефот на косовската дипломатија Енвер Хоџај дека Македонија се однесува на антиевропски начин, бидејќи косовската претседателка Атифете Јахјага не добила покана за Самитот ПСЈИЕ што ќе се одржи на први јуни во Охрид, јавува Радио Слободна Европа.
Хоџај изјавил дека и покрај неговите инсистирања и контактите со неговиот колега Поповски покана не била испратена. Ова претставува една реална загриженост за односите меѓу Косово и Македонија, тоа е факт против духот за регионалната соработка и е антиевропско однесување на Македонија кон Косово, изјавил Хоџај.
Тој смета ова е неприфатливо и најави дека ќе ги информира сите земји членки на ЕУ за потегот. Косовапресс јавува дека косовскиот премиер Хашим Тачи и порачал на Македонија да ги надмине предрасудите од минатото за Албанците во регионот.
Кабинетот на претседателот Иванов образложи зошто не е испратена покана за учество до претседателот на Косово:
-Согласно основачките акти и досегашната практика, Македонија не може без согласност од другите да поканува, особено кога ни е ставено на знаење дека со таков чекор, некои од земјите членки би го откажале учеството, вели кабинетот на Иванов.