Повеќе од 130 бегалци кои се заглавени во меѓузоната на границата со Србија ноќеска мирно протестираат со намера да извршат притисок на српската страна за да ги пропуштат во земјата. Станува збор за бегалци , кои според информациите на НОВА од терен не сакаат да се повлечат и да влезат во Македонија.
Поради драматичните случувања на границата ноќеска после полноќ пристигна тим од УНХЦР предводен од Мохамед Ариф, претставникот на Канцеларијата во Скопје.
„Мажите мирно протестираат и бараат да влезат во Србија од каде што с е вратени. Се обидуваме барем жените и децата да ги сместиме во кампот во Табановце за да не се смрзнат надвор“ изјави за НОВА, Мохамед Ариф.
Групата на бегалци е дуплирана од бројката во текот на денот. Српските власти тврдат дека границата не е затворена,а за стостојбата ја обвинуваат Хрватска дека прави селекција на Сиријци, Авганистанци и мигранти од Ирак.
Бегалците по неколку дена поминати во Хрватска се вратени назад од каде што дошле бидејќи е утврдено дека не доаѓат од земји каде што има воен конфликт.
Во текот на денот, за судбината на луѓето кои се заглавени во државата ќе одлучува управувачкиот комитет составен од министрите за здравство, внатрешни работи, труд и социјала и транспорт и врски, како и Центарот за управување со кризи.