Откако два пати се враќаа во соблекувалните а на терен одиграа само 20ина минути од финалето на Купот на Македонија, екипите на Шкендија и Тетекс, по втор пат ќе ги измерат силите за трофејот во недела во 20:00 часот пред празни трибини.
Оваа одлука е донесена денеска откако вчера финалето беше прекинато поради националистичките испади и кршење на кодексот на навивање на навивачките групи, „Војводи“ и „Балисти“.
Пред почетокот на вчерашниот натпревар, ФФМ упати јасен апел до сите оние кои ќе бидат присутни на Филип Втори дека доколку се пејат било какви националистички песни натпреварот ќе биде прекинат.
Агенцијата за млади и спорт на РМ преку соопштение ја поддржа одлуката за прекин и го осуди скандалозното однесување на навивачите како и исвиркувањето на националната химна од страна на таканаречините „Балисти“ навивачи на ФК Шкендија.
– За жал и покрај сериозните подготовки и ангажирање на клубовите, локалната самоправа и Федерацијата, сепак Финалето на Купот на Македонија во фудбал беше искористен за манифестирање на политички и националистички пораки, зачинети со насилничко и недолично однесување на поединци и дел од навивачките групи, кои ја поминаа границата на спортско навивање, со што сами се класифицираа во хулигани, кои не ги интересира спортот и спортскиот натпревар, се вели во соопштението.
Инаку, финалниот натпревар ќе започне од првата минута без оглед на тоа што вчера се одиграа околу 20 минути до конечниот прекин.