Овој судски процес има една единствена цел, да придонесе кон збогатување на оштетениот Фијат Цаноски и да резултира со оштета од буџетот на државата, изјави поранешниот градоначалник на општина Гази Баба, Тони Трајковски кој е обвинет во случајот „ТНТ”, процес кој се однесува на уривањето на комплексот „Космос“, сопственост на бизнисменот Цаноски.
– На средба со инвеститорот на објектот „Космос” Фијат Цаноски, тој не негира дека гради нелегално. Јас немам испратено порака до Никола Груевски, ниту сум го контактирал во врска со овој објект и повеќе од јасно е дека не сум бил поттикнат да дејствувам по нечија наредба, вели Трајковски.
Одбраната на поранешниот градоначалник на општина Гази Баба му предложи на судечкиот совет да биде ослободен од обвинението, а судот да ги земе предвид релевантните докази според кои не може да се најде вина во постапувањето на Трајковски.
Обвинителот Бурим Рустеми вчера, пак, побара затворски казни за обвинетите, а за Јанакиески рече дека тој се извинил, ги потврдил разговорите, а тоа е олеснителна околност, која треба особено да се цени. „Груевски ја злоупотребил функцијата и ја реализирал желбата да му се одмазди на политичкиот противник Фијат Цаноски“, рече Рустеми.
Oбвинетите Груевски, Јанакиески, Трајковски, ја користеле политичката моќ за вршење влијание, а тоа претставува упад во правниот систем , дополни Рустеми според кого во текот на судскиот процес се докажало дека изјавата на Цановски е вистинита и дека му се одмаздувале на бизнисменот.