Инспекциски контроли од Министерството за здравство денеска во 13 часот ги чешлале скопските клиники. Инспекторите проверувале кој од лекарите си заминал порано од работа, дали пациентите чекаат на Мој термин. Не е познато дали имало забелешки во работата на лекарите. Голем дел од лекарите се зачудени што на ваков ден кога јавноста очекува министерот Тодоров да излезе и да ја понесе одговорноста за случајот со смртта на малата Тамара, тој бара виновници меѓу лекарите.
„ Дојдоа во 13 часот, ненајавено и веднаш почнаа да ги бараат списоците од лекарите. Имаше многу контролори. Главната медицинска сестра им го даде списокот и не знам што се случуваше понатаму, јас бев и во амбуланта и во операциона сала. Некои од лекарите може да се во сала тоа време, други да имаат предавања или да се излезени во некои комисии“, изјави за НОВА лекар од хируршките клиники.
Пред две недели 40-тина инспектори во исто време во 13 часот, ненајавено упаднаа на скопските клиники, а министерот Тодоров кој исто така беше на една од клиниките најави дека ќе побара од директорите да проверат каде биле нивните вработени, како и соодветни мерки за одговорност на оние кои не биле затекнати на работа.
Инаку, денеска медиумите кои упорно бараа објаснување за случајот со починатото 9-годишно девојче од Велес, не добија никаква изјава од министерот Тодоров. Тој не се појави во јавноста, а немаше ниту писмено соопштение за случајот, што е редовна пракса кога се работи за промотивни активности на ресорниот министер.