– Ова е хајка против мене. Да сум склучил договор со некој со кој имам конфликт на интереси, со брат, братучед, снаа, стрина, веднаш ќе си дадам оставка. Јас склучив договор со една компанија, која по шест месеци прави договор за промена на сопственичката структура. Од каде тоа јас да го знам – изјави Тодоров во вестите на Канал 5, истакнувајќи дека се прави спин и паралела меѓу него и бизнисите на лидерот на СДСМ Зоран Заев.
Тој во интервјуто за телевизијата истакна дека одговара само за неговите постапки, а тоа е дека склучил договор само со еден сопственик на фирмата.
На прашањето дали ќе го раскине договорот со фирмата „Висарис“, Тодоров рече:
– Повреда на постапка нема, сега се испитува дали барем има повреда на обврските. Ако има и најмала причина да се раскине договорот, тоа ќе го направам.
Социјалдемократскиот сојуз денеска објави документ од Централниот регистер, според кој доминантен сопственик на фирмата ВИСАРИС МКД ДОО Скопје, уште при основањето е, не мајката на Ивона Талевска, туку самата новинарка.
– Цели 9 месеци Ивона Талевска е доминантна сопственичка на фирмата за медицинска опрема ВИСАРИС ДОО Скопје, рече Шилегов.
Обраќајки се до министерот Тодоров, Шилегов рече:
„Ова господине министре не е малку неетичко, туку е класичен пример за медиумска корупција од невидени размери. Овде не станува збор за немање етика, туку за задоволување на материјалните апетити на луѓето кои ги остваруваат медиумските апетити и интереси на вашиот шеф Никола Груевски“.