Министерот за здравство Никола Тодоров ја стопира исплатата на наградените 100 доктори, бидејќи откриле дека многумина ги лажирале податоците. Се чешлаат и другите здравствени установи, а над 70 проценти од докторите во градска болница внесувале лажни податоци.
Од највредните фатен е еден лекар кој запишувал дека сработил повеќе од своите колеги, а инспекциите ги проверуваат бодовните листи на останатите од ТОП 100 лекари на Тодоров.
Лажирањето на податоците го пријавиле двајца лекари, нивни колеги, кои реално ги внесувале своите податоци тврдат во Министертвото за здравство. Контролите во Градската општа болница “8 Септември“ пак покажала дека над 70 проценти од докторите внесувале лажни податаци, односно запишувале повеќе интервенции од она што го сработиле. Интензивни контроли денеска се вршат и во старата градска болница.
„Она што можам е да апелирам до лекарите до 14 мај да ги внесат точните податоци, на 15 мај е исплата на платата, а на 16 ќе влезат инспекции во сите здравствени установи. Доколку се утврди дека некој внесол лажни податоци, ќе бидат поднесени кривични пријави против нив. Паралелно директорите ќе поведат дисциплински постапки и тие што не се коригирале ќе бидат суспеднирани, а епилогот може да биде отказ од работа изјави Министерот Тодоров.
Ова е првиот квартал од исплата на платите според проектот „плата по учинок“како што беше договорено со синдикатот за здравство. Лекарите во изминатите три месеци ги запишуваа бодовите и се тркаа за да остварат плата предвидена според проектот.
Епилогот е дека најголем дел од нив ги лажирале податоците со што сториле сериозно кривично дело. Министерсвото најавува кривични пријави, парични казни, а за поголеми прекршоци и затворски казни од три месеци до три години.
– Ова е уште еден доказ дека проектот „плаќање по учинок“ не може да функционира во македонскиот здравствен систем од причина што лекарите имаат ограничен број на интервенции, а со тој број реално не можат да си го остварат месечниот приход. Затоа и се случува ова коментираат лекари од скопскиот клинички блок.