Министерот за здравство Никола Тодоров денеска не одговори на прашањето како ќе го искоментира делот од прислушуваните разговори кои ги објави опозицијата каде ја информира Јанкуловска за незаконски набавки во Министерството.
Тој бара Јанкуловска да испрати екипа од МВР која ќе го испита случајот бидејќи внатрешната ревизија открила дека се набивани цени, изведувачите не правеле надзор на фактури, а биле исплатени пари за работи што воопшто не се изведени,.
„Станува збор за сечени, лепени и конструирани материјали“, кратко одговори на прашањето на НОВА, министерот Тодоров.
Тој не обајасни со која цел бара од Јнакуловска да испрати екипа од МВР да го истражува случајот за незаконски набавки, за кои како што рече, биле и од неговиот претходник. До денес не се знае што покажала таа истрага и дали некој одговарал.
Екс министерот за здравство Бујар Османи не беше достапен да одговори дали со него било разговарано за ова, дали навистина направил промашени инвестиции како што е болницата во Охрид каде биле потрошени 400 000 евра, за кои Тодоров вели дека завршиле во бунар. Имало ли разговор меѓу нив за ова.
Во разговорот може да се слушне како сијалици од 20 000 денари биле купувани за 70 000 денари, а количината била неколку пати зголемувана. Тодоров и вели на Јанкуловска дека во болницата во Охрид излегле непредвидени работи, дека се било промашена работа, почнувајќи од процедурата до изведбата, во документацијата и работата на терен.