Македонските власти уверуваат дека низ територијата на Македонија не бил транспортиран опасниот отпад за кој српските медиуми информираа дека е фрлен во близина на границата со нашата држава.
Од Државниот инспекторат за животна средина велат дека доколку информациите од медиумите се покаже дека се точни, можно е фирмата која го транспортира токсичниот отпад некаде да го одложила на неодредено време и шлеперите да стојат паркирани на некоја тајна локација во Србија.
Тие утринава стапиле во контакт и со царински служби од каде што им потврдиле дека досега не примиле дојава од Фирмата Про-Пласт од Сремска Митровица дека ќе траспортираат отпад низ Македонија.
-Доколку овој отпад стои некаде тој набргу ќе биде откриен и одложен на соодветно место. Ние сме во комуникација со српското Министерство за екологија, ја следиме состојбата и доколку има некаква нова информација ќе ги информираме граѓаните изјави за НОВА Фериз Мемед директор на Државниот инспекторат за животна средина.
Вчера дел од српските медиуми објавија дека четири шлепери со токсичен отпад завршиле на територија меѓу Србија и Македонија, а дел од токсичниот отпад најверојатно завршил во Јадранско море.
Најмалку 2000 тони токсичен отпад од Србија требало да биде однесен во Кина преку Хрватска, Грција и Романија но не се знае каде завршил.
Во тек е истрага во кои се вклучени и служби од регионот бидејќи постои сомнеж дека отпадот воопшто не стигнал до крајната цел, туку дека фирмата „Про -Пласт“од Сремска Митровица нелегално го фрлила во овие држави.
Според пишувањето на Вестинет и српски Курир, најмалку 300 тони од овој опасен отпад се наоѓа во Србија. Акцијата ја води Царинската управа во соработка со Министерството за енергетика и животна средина.