Со осум гласа „за“ три „против“ и еден воздржан членовите на Собраниската Комисија за прашања на изборите и именувањата на денешната седница ги изгласа старо – новите членови на Комисијата за верификација на факти.
Томе Аџиев останува претседател на Комисијата, откако синоќа Јанаќи Витановски, поранешен член на комисијата по предлог на СДСМ, ја повлекол својата кандидатура.
Заменик-претседател е Асан Лума, стоматолог од Тетово, а за членови се избрани досегашниот портпарол Предраг Дамјановски, Јовица Велјановски, Ѓорѓи Малковски, Пецко Здравевски, Шпенди Винца, Даут Даути, правничката Цветанка Соколова-Младенова, Ристана Лалчевска поранешен пратеник од Либерална Партија и Марија Милошевска.
Ова значи дека Комисијата има само три нови членови, останатите се од стариот состав. Меѓу новите предлози за членови на Комисијата го нема Чедомир Дамјановски.
На гласањето претходеше расправа на која прв за збор се јави Горан Сугаревски од СДСМ, кој рече дека со предлогот Аџиев повторно да биде избран за претседател на Комисијата продолжува борбата со неистомислениците.
Според него со Законот за лустрација власта води политика на линч и инквизиција иако во неколку наврати ЕК потенцираше дека овој процес лошо се спроведува. Сугаревски побара да се образложи зошто наместо ротирачки мандат на шест месеци како што стои според законот, Аџиев имал мандат од речиси три години.
„Вашето неучество и негласањето на предлогот утврден на Комисијата пред две години – со самото тоа вие му го продолживте мандатот на Аџиев“, му возврати претседателот на Комисија за прашања на изборите и именувањата, Илија Димовски, образложувајќи дека наместо да помогне, бидејќи сметаат дека работењето на Лустрациска е неисправно, СДСМ оваа тема ја користат за политички пресметки во Собрание.
Според него во извештаите на ЕК била потенцирана потребата за лустрација од „потврд карактер“.
Во дискусијата се надоврза и пратеникот Горан Мисовски, кој исто така бурно реагираше на предлозите за претседател, заменик-претседател и членството во Лустрациска, и побара од претседателот на Комисијата, Илија Димовски да одговори какви закони спровел Аџиев досега, и рече дека ВМРО-ДПМНЕ со лустрацијата директно осакатиле десетици и десетици семејства.
Обраќајки се кон Димовски тој директно го запраша за употребата на терминот „кодош“, и побара од него да образложи, повикувајќи се на законот за определување услов за ограничување за вршење јавна функција, пристап до документи и објавување на соработка со органите на државната безбедност, на која функција сега нема да можат да имат пристап академик Томе Серафимовски, Божин Павловски, и починатиот Славко Јаневски.
Во изминатите пет години Комисијата за верификација на фактите прогласи 124 лица за наредбодавачи и соработници или соработници со поранешните тајни служби. Од нив 106 се поранешни извршители на јавни функции, 11 биле актуелни и седуммина биле кандидати за извршување јавни функции. Триесет и три починати лица се прогласени за кодоши.
Изборот на членови на Комисијата за верификација на факти се врши во Собранието на Република Македонија.