Собраниската Комисија за прашања на изборите и именувањата на денешната седница го предложи за претседател досегашниот прв човек на Комисијата за верификација на факти, Томе Аџиев.
Јанаќи Витановски, поранешен член на комисијата по предлог на СДСМ, вчера ја повлекол својата кандидатура за претседател.
За заменик е предложен Асан Лума, стоматолог од Тетово, а за членови досегашниот портпарол Предраг Дамјановски, Јовица Велјановски, Ѓорѓи Малковски, Пецко Здравевски, Шпенди Винца, Даут Даути, правничката Цветанка Соколова-Младенова, Ристана Лалчевска поранешен пратеник од Либерална Партија, Марија Милошевска.
Ова значи дека Комисијата ќе има само три нови членови, останатите се од стариот состав. Меѓу новите предлози за членови на Комисијата го нема Чедомир Дамјановски.
На овие предлози прв за збор се јави Горан Сугаревски од СДСМ, кој рече дека со предлогот Аџиев повторно да биде избран за претседател на Комисијата продолжува борбата со неистомислениците.
Според него со Законот за лустрација власта води политика на линч и инквизиција иако во неколку наврати ЕК потенцираше дека овој процес лошо се спроведува. Сугаревски побара да се образложи зошто наместо ротирачки мандат на шест месеци како што стои според законот, Аџиев имал мандат од речиси три години.
„Вашето неучество и негласањето на предлогот утврден на Комисијата пред две години со самото тоа вие му го продолживте мандатот на Аџиев“, му возврати претседателот на Комисија за прашања на изборите и именувањата, Илија Димовски.
Спореднего во извештаите на ЕК била потенцирана потребата за лустрација од „потврд карактер“.
Изборот на членови на Комисијата за верификација на факти се врши во Собранието на Република Македонија.