Павле Трајанов, претседател на Демократскиот сојуз кој е дел од владината коалиција, во неделното интервју на Радио Слободна Европа вели дека ваквото прислушување се случува само во авторитарни држави.
На прашањето на новинарот дали тој бил дал оставка ако е на местот на Гордана Јанкуловска, Трајанов вели:
“Знаете, мислам дека полека е нагризан интегритетот на повеќе министри, вклучително и на министерот за внатрешни работи и тоа е личен чин, оставката, доколку некој чувствува лична одговорност од морални причини, тоа треба да го направи во спротивно, мислам дека парламентот треба да отвори расправа, сериозна расправа, и да го утврди степенот на одговорност на секој носител на јавна функција и да донесе соодветни заклучоци. Ние мора да го расчистиме до крај овој случај или оваа мега афера за да не се повтори никогаш повеќе. Значи, ние постојано имаме злоупотреба на овие системи, од 90-тите години наваму постојано имаме и никогаш докрај не сме ги расчистиле. Знаете овие работи се специфични само за авторитарни држави, тогаш кога тој што практично ја води државата сака да има информации, да навлезе во интимата на секој граѓанин, на секој носител на јавна функција и мислам дека тоа е погрешниот пристап и резултат на еден таков начин на владеење се случуваат вакви работи.”
Иако неговата партија е дел од владината коалиција Трајнов не најавува дека е подготвен да излезе од коалицијата која остро ја критикува.
Тој вели дека одговорноста за ова што се случува во Македонија паѓа врз власта и смета дека не чувствува лична одговорност:
“Кампањата што ја водеше Демократскиот сојуз заедно со коалиционите партнери, зборувам за она што ние бевме информирани, беше сосема согласно постоечките правила и прописи, така што апсолутно не чувствувам одговорност, ниту, пак, е нарушен мојот интегритет како пратеник, затоа што некој друг се дрзнал да ги крши правилата, тоа не го поддржувам и барам сосема јавно, повикувам работите докрај да се расчистат и сите оние што се инволвирани, ако тоа се докаже тоа во една законска процедура, за тоа треба да сносат одговорност.”