Ноторна лага се информациите што деновиве ги пласираат некои медиуми дека измените на Законот за ДДВ ќе бидат смртна казна за малите бизниси, рече денеска директорот на Управата за јавни приходи Горан Трајковски, објави МИА.
Според него, нонсенс се и тезите дека оваа мерка се воведува за да се полни буџетот.
– Ова е барање на малите и ситните бизниси, тоа најодговорно го тврдам. Доколку тие не се ДДВ обврзници, не можат да бидат конкурентни и атрактивни на пазарот, ниту препознатливи за големите компании – рече Трајковски денеска на прес-конференција.
Според него, овие измени се кои треба да стапат во сила од 1 јануари 2015, се носат за воспоставување фер и еднакви услови на пазарот, како и за зголемување на лојалната конкуренција.
– Либерализацијата на условите за станување ДДВ обврзник се, пред се, во прилог на бизнисите, а не во прилог на Буџетот. Во оваа насока зборуваат бројките, реалноста, теоријата, искуството и фактите. Оној што не е ДДВ обврзник е во инфериорна, подредена положба. По дефиниција, секој ДДВ обврзник сака да работи со ДДВ обврзник. Малите ДДВ обврзници создаваат негативен ДДВ ефект на буџетската сметка, односно во вкупната наплата на данокот на додадена вредност – рече Трајковски.
Во Македонија моментно се регистрирани 34.000 ДДВ обврзници. 10.305 субјекти исполнуваат услови да станат ДДВ обврзници со планираниот праг од еден милион денари годишен промет – 9.060 правни лица и 1.245 трговци-поединци.
Одговорајќи на новинарско прашање како го коментира ставот на занаетчиските комори според кои измените на Законот за ДДВ ќе предизвикаат отпуштања на вработени, Трајковски вели дека тие бизниси очигледно пропаѓаат поради таквите раководства.