Критикувајќи го Зеленски, американскиот претседател рече дека и просечен преговарач можел да направи спогодба пред неколку години „без загуба на голема територија“.
Многу сум разочаран, слушам дека се вознемирени поради тоа што немало место за нив (на разговорите). Денес слушнав: ‘Не бевме поканети’. Па вие сте таму три години…Никогаш не требаше да ја започнете (војната). Можевте да направите договор, рече Трамп.
Американскиот претседател Доналд Трамп синоќа упати критики до неговиот украински колега Володимир Зеленски во врска со неговите забелешки дека бил изоставен од разговорите меѓу САД и Русија за ставање крај на војната во Украина.
Говорејќи во Флорида, американскиот претседател изјави дека Украина можела да направи договор за да се избегне војната, но не го сторила тоа.
Претседателот на САД во обраќањето рече и дека е посигурен оти разговорите меѓу САД и Русија што одржаа во Саудиска Арабија може да доведат до постигнување договор за завршување на војната.
Истовремено Трамп повтори едно од клучните барања на Москва, а кое се однесува на одржување на претседателски избори во Украина, со што го зголеми притисокот врз Зеленски околу ова прашање.