Имавме прекрасна средба”, изјави утринава американскиот претседател Доналд Трамп зборувајќи за својот вчерашен прв состанок со неговиот руски колега Владимир Путин.
Оваа куса изјава во “твитерскиот” стил на Трамп за “прекрасноста” на средбата, мора да биде нијансирана со брифинзите на руската и американската делегација дадени вчера во Хамбург на присутните новинари.
Според шефот на американската дипломатија Рекс Тилерсон, разговорот помеѓу двајцата лидери бил “многу долг и многу енергичен” околу сомнежите за руско мешање во американските претседателски избори. Рекс Тилерсон додаде дека рускот мешање е “значајна пречка” во односите на двете земји.
Трамп, според Тилерсон, повеќе пати го споменал ова руско мешање во разговорот со Путин а Русинот тоа го демантирал.
Руската делегација има друга верзија на истиот настан. За Москва Трамп ги прифатил руските деманти:
“Претседателот Трамп рече дека ги слушнал јасните деманти на Путин кој рече дека сето ова не е вистина и дека руските власти не се мешале во изборите во САД. Трамп го прифати овој демант”, рече рускиот колега на Тилерсон, Сергеј Лавров.
Во САД се во тек повеќе истраги за врските на Трамп во Русија во текот на изборната кампања па така, ветувањата на Трамп за нормализирање на односите со Русија никако не успеваат да се реализираат. Вчерашната средба на двајцата лидери во Хамбург беше можност да се “испеглаат” разликите но досега не може да се тврди дека тоа навистина се случило.
НАТО
И други теми се проблематични во руско-американските односи. За нас се најважни разликите помеѓу двете земји околу НАТО.
За Москва секое проширување на НАТО е знак на агресија кон Русија и оваа земја постојано повторува дека оваа политика не само што не и одговара туку е и опасна бидејќи, според Москва, ова проширување е напад врз Русија. Во текот на изборната кампања во САД Трамп зборуваше за НАТО како за застарена институција но, кога стапи на власт, тој го смени тонот. Во мај во Брисел Трамп изјави дека НАТО “мора да се фокусира врз руската закана”.
Сирија, Украина, Северна Кореја
Другите теми околу кои Вашингтон и Москва имаат сериозни разлики во ставовите се Сирија, Северна Кореја и Украина.
Околу Сирија вчера дојде до договор со прекин на оган во оваа земја кој стапува на сила утре.
Но Украина се чини е “потежок” случај. САД ја обвинуваат Русија дека ги поддржува сепаратистичките бунтовници на истокот на Украина па Вашингтон ги продолжи санкциите против Москва на 20 јуни.
Кремљ од своја страна демантира било каква воена поддршка на овие бунтовници. За Москва овие санкции се всушност “скриен протекционизам”.
Трамп вети “остар” одговор до Северна Кореја и нејзиниот диктатор во Пјонгјанг, кој се заканува со нуклеарно оружје кое може да стаса со Аљаска. САД сакаат да воведат нови построги санкции против овој режим и не исклучуваат и употреба на воена сила. Но Русија веќе предупреди дека ќе се спротиви на било кој предлог за санкции. Путин го повика Трамп да “остане ладнокрвен” во оваа криза.