Американскиот претседател Доналд Трамп повторно на социјалните мрежи ја употреби репликата од серијата „Игра на престолот“, но овојпат поради ѕидот на границата со Мексико.
На фотографија, која Трамп ја сподели, се наоѓа тој заедно со натписот „Ѕидот доаѓа“, алудирајќи на популарниот слоган од таа серија – „Зимата доаѓа“.
Ова не е првпат американскиот претседател да го употреби тој слоган, со цел да се „пресмета“ со противниците.
Во ноември минатата година заедно со својата фотографија го објави и натписот „Санкциите доаѓаат“, што беше упатено кон Иран.
Во серијата „Игра на престолот“ ѕид од мраз го штити фантастичното средновековно царство. Но, последните настани во серијата покажуваат дека ефикасноста на тој ѕид е под знак на прашање.
Проблемот на Трамп е што од вчера американските Демократи имаат мнозинство во Претставничкиот дом и очигледно ќе направат се за да му го комплицираат претседателскиот мандат на Доналд Трамп во наредните две години.
Демократите имаат намера да отворат истраги за “руската афера”, се закануваат со процедура за “импичмент”, најавуваат откритија за даночните измами на Трамп, а ќе се занимаваат и со имиграцијата, здравството или климата, теми за кои со Трамп се на сосема поинаква бранова должина.
Но, првата задача на Демократите и на Трамп, е да се најде решение за “shutdown” кој ја парализира американската администрација од 22 декември 2018 година. Демократите веќе го исправија пред Трамп првиот предизвик а тоа се привремени буџетски мерки што ќе дозволат деблокирање на админстрацијата. Тие сакаат да се покажат како «разумни» наспроти «каприците» на Трамп. Но проблем е тоа што овие мерки не ги содржат петте милијарди долари што Трамп ги бара за градење на ѕидот на границата со Мексико, причината за блокадата на администрацијата.
Се разбира, Трамп најавува дека нема намера да ги прифати овие мерки па така минимални се шансите овој предлог на Демократите да помине. Аналитичарите се надеваат дека преговорите со Трамп ќе доведат до поширок компромис кој ќе им дозволи на двете страни да излезат како победници. На пример, Трамп би добил пари за ѕидот а за возврат тој треба да им овозможи статут на странците кои се без документи а во САД стасале кога биле деца. Овие лица во САД се наречени “Dreamers” (Сонувачи).