Во Собранието денеска треба да продолжи дебатата за Предлог-измените на Законот за минимална плата. Собраниската расправа трае трет ден.
Со ова законско решение, минималната плата од март треба да се зголеми на 18.000 денари од сегашните 15.200 денари. Очекувањата се дека ќе бидат опфатени околу 80.000 работници кои веќе во април ќе земат зголемена минимална плата. Зголемувањето на минималната плата ќе биде помогнато од страна на државата, која од Буџетот ќе одвои 16 милиони евра за покривање на разликата во придонесите.
Законското решение уследи откако на 7 февруари по неколкудневни преговори беше постигнат договор меѓу синдикатите, работодавачите и Владата во рамки на Економско-социјалниот совет. Синдикатите бараа итно зголемување на минималната плата поради повисоките животни трошоци и фактот дека две минимални плати се малку за да се покријат основните потреби што се пресметуваат во синдикалната потрошувачка кошничка.
Со измените се менува и методологијата за годишното усогласување на минималната плата, односно усогласувањето ќе се врши според следните критериуми – 50 проценти од годишниот раст на просечната плата и 50 проценти од трошоците за живот, а висината на минималната плата не смее да биде пониска од 57 проценти од просечната плата.
Предлог-измените се на дневен ред на 62. собраниска седница, а претходно поминаа на матичната Комисија за труд и социјална политика.
На дневен ред на оваа собраниска седница остануваат уште и измените на Законот за тутун, Предлог-законот за регулирање на статусот на бесправно изградените објекти, Предлог-законот за инспекциски надзор во животната средина и Предлог-законот за сметководствени работи. Дел од пленарната седница е и Предлог декларацијата за борба против корупцијата како стратешки документ на државата и државните политики.