Новиот Закон за спречување на корупцијата и судир на интереси е доставен до Собранието овојпат со европско знаменце и скартена постапка.
Законот беше повлечен најпрво по барање на европските експерти кои побараа да се интервенира во одредени делови за да се зајакне независноста на антикорупциската комисија. Вториот пат беше повлечен откако пратениците на ВМРО ДПМНЕ поднесоа десетици амандмани,и власта тврдеше дека со тоа практично ќе се оневозможи донесувањето на Законот пред претседателските избори.
Опозицијата е против новите ингеренции кои сега ги добива антикорупциската комисија – да има увид во банкарски сметки и во сметките на политичките партии. ВМРО ДПМНЕ е на став дека со вакви ингеренции антикорупциската комисија ќе се претвори во тело за политички реваншизам.
ДКСК е нефункционална цели 10 месеци откако оставки поднесоа пет членови на Комисијата поради наводите за ненаменско трошење на буџетски средства од нивна страна. Јавното обвинителство на Република Македонија објави дека скопското Основното јавно обвинителство оформи предмет по допрен глас за трошењето на буџетски средства од страна на членовите на ДКСК.
Со новото законско решение се зголемуваат и критериумите за избор на членовите и претседателот на комисијата. Членови на Антикорупциска повеќе нема да можат да бидат оние кои во изминатата деценија биле пратеници, членови на Владата или функционери во органите на политичка партија, а не ќе можат да се кандидираат ниту донатори на некоја политичка партија.
Познат профилот на идните антикорупционери
Според Предлог законот, антикорупционерите ќе имаат пристап до сите податоци што за функционерите ги има УЈП, МВР, Фонд за пензиско, Катастарот, Берза, Народната банка и до сите банкарски сметки.
Антикорупциска ќе ги следи промените на имотите на функционерите и по завршувањето на нивниот мандат, ќе ги проверува сомнителните партиски вработувања и доделените грантови на блиски луѓе на политичарите.
Тие ќе имаат право и да ги повикуваат на разговор лицата против кои се води постапката, но да користат и надворешни експерти.
Еден член на Комисијата ќе биде номиниран од Народниот правобранител, еден претставник од Советот за соработка меѓу владата и граѓанскиот сектор за областа Демократија и владеење на правото, член од Советот за соработка меѓу владата и граѓанскиот сектор за областа Медиуми и информатичко општество и по двајца пратеници од власта и од опозицијата. Комисијата потоа листата на кандидати ја доставува до собраниската Комисија, која ќе му ги предложи на Собранието да ги избере.
За тоа дали овие измени ќе можат да поттикнат ефикасна борба против корупцијата, од разговорот на НОВА со Драги Малиновски, поранешен член на антикорупциската комисија.