Со изнесување на материјални докази на Специјалното јавно обвинителство денеска во Кривичниот суд во Скопје продолжува судењето за „Трезор“, за набавката на електронско-комуникациска опрема за потребите на Петтата управа при Управата за безбедност и контраразузнавање.
На обвинителна клупа во Кривичниот суд се поранешниот директор на УБК Сашо Мијалков, поранешен шеф на неговиот кабинет Тони Јакимовски и поранешниот помошник-министер во МВР, Небојша Стајковиќ.
Пред почетокот на денешното рочиште претседателот на судечкиот совет судијката Џенета Бектовиќ, извести дека обвинетиот Тони Јакимовски има поднесок за бришење на условната осуда.
Обвинителот Артан Ајро почна со изведување материјалните докази, за тоа дека „Финзи“ примала пари од МВР по фактура од 2010 година на над 70 милиони денари за прва испорака на опрема за нејзина инсталација, тренинг и испорака.
Додека обвинителот читаше докази со фактури за доставената роба до МВР, рече дека има и ставки на латници и не може да ги прочита, по што одбраната побара да бидат преведени.
По реакција од адвокатот Петар Василевски до судот, дека нема биро да фаќа забелешки, обвинителот Трајче Пеливанов рече дека не му треба, затоа што и така не носи чанта, по што настана вербална конфронтација, која за момент ја прекина обвинетиот Сашо Мијалков.
Тој од судот побара целосно изведување на доказите, односно да се чита целата содржина на доказите, за како што рече, да и стане јасно на јавноста за што се работи.
– Нашето барање за целосно читање на доказите е да слушне јавноста што точно се набавувало од опрема, а со тоа и ќе докажеме дека не сме виновни, рече Мијалков на судот.
Судот даде пауза за да се обезбеди биро за адвокатот Василевски, по што продолжи рочиштето.
По однос на барањето за начинот на изнесување на доказите од СЈО, Судот претходно се изјасни дека обвинителот може да ги изведе на начин на кој што смета дека треба да бидат изведени.
За случајот поднесени се над 900 материјални докази.
Обвинетите во „Трезор“ се товарат за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.
За случајот поднесени се над 900 материјални докази.
На претходното рочиште Судечкиот совет донесе решение на обвинетиот Горан Грујевски да му се суди во отсуство, со оглед дека Врховниот суд во Атина донел одлука против екстрадиција на обвинетиот и со истата е прекинат неговиот притвор и е пуштен на слобода. Во контекст на тоа Судот го зема во предвид и известувањето од СВР Скопје дека Грујевски не е достапен на органите на прогон.
Обвинетите во „Трезор“ се товарат за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.