Кривичниот совет при Основниот суд Скопје 1 ја одби жалбата на СЈО по одлуката на судијата на претходна постапка дека не е потребен притвор за Горан Грујоски, првоосомничен во случајот „Трезор“.
– Кривичниот совет при Основниот суд Скопје 1 – Скопје, постапувајќи по жалба на СЈО против решение на судија на претходна постапка при овој суд, денеска во присуство на странките, по барање на СЈО, одржа седница на која донесе решение со кое жалбата на СЈО се одбива како неоснована, а се потврдува решението на судија на претходна постапка со кое не беше прифатен предлогот на СЈО за определување мерка притвор против едно лице опфатено со предметот на наведеното обвинителство во јавноста познат како „Трезор“, бидејќи не се основани наводите во предлогот на обвинителството, се вели во соопштението на Судот.
Оттаму дополнуваат и дека Апелациониот суд – Скопје доставил решение со кое одбиена е и жалбата на СЈО поднесена против решението на Претседателот на Кривичниот суд со која не беше прифатено барањето за изземање на судијата, надлежна да постапува по обвинителниот предлог на СЈО, против 7 лица за кривичното дело Фалсификување службена исправа.
– Апелациониот суд ги ценел наводите во жалбата на СЈО, но ги одбил како неосновани и утврдил дека Претседателот на првостепениот суд правилно постапил кога согласно одредбите од член 33 ст.2 од ЗКП, со образложено решение, го одбил барањето за изземање на судијата бидејќи не постојат околностите кои предизвикуваат сомнение за непристрасност на судијата за кој се бара изземање, се вели во соопштението.