Во редовите на џихадистичката група Исламска држава (ИД) во Сирија и во Ирак се бореа и околу 100 лица по потекло од државите од поранешна СФР Југославија, смета професорот од белградскиот Факултет за безбедност, Дарко Трифуновиќ
„На страна на џихадистите се бореа околу 100 лица по потекло од Србија, од Косово, од Босна и Хрецеговина и од Македонија. Сите тие прво заминале во Германија и во Франција и од таму се упатиле кон Блискиот Исток. Голем број невладини организации претставуваат логистика за терористите. Постои машинерија што ги создава тие борци што никогаш не беше уништена, изјави Трифуновиќ за српската телевизија „Прва“.
Според него, по разбивање на ИД тие веројатно ќе бараат начин да се вратат во своите родни краишта и никој нема да може да ги спречи. Трифуновиќ нагласува дека американскиот претседател Доналд Трамп најверојатно ќе ги пушти овие џихадисти да се вратат во Европа.
„Трамп всушност со ова испраќа порака до Европа: Вие не кртикувате, а ние трошиме милијади за да ве штитме“, истакнува Трифуновиќ.
Тој смета дека властите во земјите од регионот ќе биде тешко да докажат дека некои од овие повратници се бореле на страна на ИД во Сирија и Ирак.
„Европа едноставно ќе ги пушти да влезат бидејќи нема друго решение, нагласува Трифуновиќ, додавајќи дека многумина од овие борци на ИД имаат пасоши на туѓи имиња изработени во „печатници за фалсификувани пасоши со висок квалитет“.
Тој посочува дека овие луѓе „се здружени околу идејата на политички ислам што го користи тероризмот за остварување на своите цели.