Во текот на 2021 година во Основниот кривичен суд Скопје, по поднесени обвинителни акти или предлози за кршење на мерката изолација се примени 569 предмети за 939 лица, а од нив се решени 391 предмет за 649 лица. Од нив како правосилни, до овој момент, се заведени 206 предмети за 284 лица.
Мерките против ширење на ковид-19 се укинати, освен задолжително носење маски во јавни и приватни здравствени установи, во домови за стари лица и во детски градинки, но и натаму може да заглавите и во затвор доколку ја прекршите мерката изолација додека сте заразени со вирусот.
Оваа казна во минатата година ги снајде тројца граѓани кои треба да одлежат затворски казни од шест месеци до една и пол година, бидејќи додека биле заразени со ковид-19 ја прекршиле мерката изолација. Наместо да седат дома, изолацијата прво беше 20, па 15, а сега е седум дена, полицијата ги затекнуваше граѓаните инфицирани со вирусот како ја прекршуваат оваа мерка на улица, во продавница, а некои беа затекнати и во угостителски објекти. Многу од граѓаните ја прекршуваа задолжителната изолација и тоа не само напуштајќи го домот, туку ја напуштија и државата. На прашањето како е можно некој заразен со ковид-19 да ја напушти државата и покрај решение за изолација, оправдувањето беше дека на граничните премини не ги добивале извештаите од ДСЗИ за тоа кому му е определена оваа мерка.
– Во истиот период, од јануари до декември 2021 година, од страна на МВР биле поднесени 221 кривична пријава против 246 лица коишто не ја почитувале мерката, односно примените решенија за изолација, потврдија за НоваТВ од Основниот кривичен суд Скопје.
На прашањето дали и колку од овие кривични пријави од МВР за кршење на мерката изолација имаат и судски пресуди, колку граѓани ја платиле казната за овој прекршок, од Основниот кривичен суд Скопје појаснуваат дека во однос на извршувањето на санкцијата, сеуште течат законски утврдените рокови за извршување на санкцијата пред да се донесе решение за присилна наплата, па така во текот на оваа година санкцијата е извршена во 13 предмети кои биле решени и правосилни во текот на 2021 година.
– Што се однесува до предметите од претходната 2020 година, до овој момент се извршени 440 пресуди, од кои најголем дел парични казни за прекршување на мерката изолација, ни изјавија од Основен кривичен суд Скопје.
Од Судот додаваат дека, по извршените проверки во системот, во текот на 2021 година во Основниот кривичен суд Скопје, по поднесени обвинителни акти или предлози за кршење на мерката изолација се примени 569 предмети за 939 лица, а од нив се решени 391 предмет за 649 лица. Од нив како правосилни, до овој момент, се заведени 206 предмети за 284 лица.
– Во однос на видот на одлука, најголем процент од донесените пресуди се парични казни кои се во рамки на законски пропишаната казна, а во два сеуште неправосилни предмети е определена затворска казна и тоа: во еден предмет две лица се огласени за виновни и осудени на казна затвор во траење од 1 година и 6 месеци, а во друг предмет едно лице е огласена за виновно и осудено на 6 месеци затвор, појаснуваат од Судот.
Директорката на Државниот санитарен и здравствен инспекторат, ДСЗИ, д-р Ирина Сотирова Бухова ни изјави дека инспекторите и натаму издаваат решенија за изолација на заразените со ковид-19, односно дека тој дел од протоколот е непроменет, а МВР продолжува да врши контрола врз спроведување на оваа мерка.
Љубица Балабан