Една бремена жена го изгубила плодот, а две побарале да им биде извршен абортус поради тоа што биле заболени од морбили. Од Клиниката за гинекологија објаснуваат дека едната од двете бремени жени се јавила на првостепена комисија, на свое барање, за прекин на бременост поради заболување од морбили. Од комисијата и бил дозволен, по што бил извршен прекин на бременоста по сите протоколи.
На првостепена комисија се јавила уште една пациентка со прележани морбили во текот на бременоста. По нејзино барање, одобрен бил прекин на бременоста. Сето ова се случувало во последните при месеци. Пациентката која го изгубила плодот, освен морбили имала и висок крвен притисок, а бебето го изгубила веднаш по приемот на Гинекологија.
„На ГАК-Скопје беше примена и пациентка од Велешко во 22 гестациска недела, по претходно три царски реза, последниот пред 18 месеци. Пациентката има претходно егзитиран плод по последниот царски рез. Стануваше збор за пациентка прекумерна тежина и висок крвен притисок. Таа имаше осип во прилог на морбили. По приемот на Клиника настана спонтан абортус на мртов плод, по што е направена инструментална ревизија на матката. Постапено е по сите протоколи за третман и изолација на пациентката, по совет од инфектолог и од комисијата за интрахоспитални инфекции. По стабилизација на состојбата пациентката беше испишана од нашата Клиника и со придружба беше испратена за натамошна хоспитализација и третман на Клиниката за инфективни болести во Скопје“, велат на Клиниката за гинекологија.
Од ГАК велат дека пациентките заразени од морбили, се изолираат во посебна просторија и имаат посебен хигиенски третман. По завршување на интервенцијата просториите се чистат со дезинфекциски средства и се кварцаат. Персоналот користи заштитни маски. Кај персоналот на ГАК нема заразени од морбили.
Со оглед на денешниот заклучок на Комисијата за заразни болести, да се прогласи епидемија на мали сипаници на територија на целата држава, Универзитетската клиника за гинекологија и акушерство – Скопје ја издава следната информација која се однесува на перинатолошките аспекти на ова заболување и другите форми на исипни трески (варичела, рубеола).
Морбилите како инфективно, високо контагиозно заболување, подедакво ја загрозуваат трудничката популација на територијата на која се појавуваат. Ризиците од појава на заболувањето се повисоки помеѓу невакцинираната трудничка популација. Ризиците кои се однесуваат на текот и исходот на бременоста се повеќекратни. Иако, научната јавност нема усогласен консензус, досегашните искуства покажуваат дека заболувањето е поврзано со повисока стапка на спонтани пометнувања (абортуси), кај пациентките кои заболуваат во рана фаза од бременоста. Заболувањето не е поврзано со зголемен ризик од вродени аномалии, но ризикот од предвремено породување кај овој дел од трудничката популација е поголем и дирекно е поврзан со фебрилната фаза на болеста.
Истовремено, како последица на повисоките стапки на предвремено породување, расте и стапката на перинаталниот морталитет, условено од појавата на конгенитална форма на заболувањето. Појавата на заболувањето во периодот на очекуваниот термин за породување, исто така ги зголемува ризиците во однос на неповолниот перинатален исход и кај терминските бремености. Што се однесува до ризиците по здравјето на мајката, заболувањето е поврзано со повисок ризик од компликации на респираторниот систем, во однос на општата популација.
Сепак, од ГАК велат дека ова заболување не е единственото кое е оптоварено со ризици од перинатолошки аспект. Покрај горенаведените ризици, кои се однесуваат и на другите форми на исипни трески, варичелата и рубеолата се поврзани и со зголемени ризици од појава на конгенитални аномалии т.е вродени дефекти, интраутерин застој во растот и развојот на плодот, што резултира со раѓање на плод со пониска родилна тежина од очекуваната, како и со зголемен ризик од интраутерина фетална смрт.
Во случаите на пациентки со варичела, која се јавува во очекуваниот термин за породување, импликациите по перинаталниот исход се особено сериозни заради асоцијацијата на конгениталната форма на заболувањето со респираторните компликации и компликциите на централниот нервен систем, кај новородено од мајка со активна форма на болеста во моментот на породувањето.