„Учениците имаат потреба од современи алатки. Дали ние треба да зборуваме за дигитализација кога целиот свет веќе ја користи неа“, вели министерката за образование, Мила Царовска, во врска со дигитализација во училиштата низ Македонија.
Според неа, дигитализацијата на учебниците не е тренд, тоа е потреба и се случува во целиот регион.
„Дали како држава покажавме дека само за еден месец успеавме да трансформираме наставата да се одвива дигитално. Не се знае со какви предизвици ќе се справуваме за три или пет години. Ако ги погледнете анкетите, ќе видите дека нашите деца и ученици не сакаат да одат на училиште и не им е интересно. Тие сакаат анимација, нешто што ќе ги возбуди, а тоа ќе го направиме со дигиталната форма. Ги повикувам родителите да бидат информирани, да не подлегнуваат на партиски ботови и да ги следат соопштенијата на МОН“, потенцира Царовска и додава дека секој ученик ќе добие хартиена форма, дигитална и брајово писмо, што ќе биде новитет.
„Не се укинати сите учебници. Се надевам дека дигиталната форма ќе даде резултати, а ако никој не е задоволен после 4-тото одделение, можеме да размислуваме да се вратиме на хартиената форма. Новата концепција предвидува учење на училиште, а домашната задача да биде само 20 минути пишување. Дигиталниот учебник е стимулација, не е само директно учење“, истакна министерката.
Во однос на стартот на идната учебна година и за тоа како ќе биде организирана наставата министерката Царовска нагласи да не се верува на секакви шпекулации и дека тој ќе зависи од епидемиолошката состојба во земјава. И во наредната учебна година министерката за образование и наука Мила Царовска вели дека ќе се оди со безбеден пристап, а кој и каков ќе биде ќе зависи и од ставот на Комисијата за заразни болести, Министерството за здравство.