Цената на ПСР тестовите за КОВИД-19 кои се на товар на Фондот за здравствено осигурување ќе биде иста како за јавните така и за приватните лаборатории, потврди директорот на ФЗО, Ден Дончев на денешната прес конференција.
„Таа цена е по ДРГ и важи за сите кои склучуваат договор со Фондот, без разлика дали се работи за јавна или за приватна здравствена установа“ рече Дончев.
На прашањето на НОВА , упатено до директорот Ден Дончев, зошто драстично се зголеми цената во приватните лаборатории во исто време кога Фондот ги намали цените во јавните установи за ПСР тестовите, Дончев одговори дека кај приватните здравствени установи треба да се бара одговорот зошто ја зголемиле цената на тестовите за КОВИД-19 иако првично за оваа услуга имале дефинирана цена од 1.500 денари.
„Зошто потоа приватните здравствени установи ја зголемија цената, треба на нив да им се постави прашањето“, одговори Дончев.
На прашањето за огромната разлика на цените за тестови за коронавирус меѓу јавните и приватните установи, тој појасни дека според анализа на Фондот од пред извесен период се утврдило дека евентуалната цена за тест за КОВИД-19 по ПСР-методологија би била околу 3.600 денари, но истовремено, рече, цената која се наплаќа во слободни услoви на пазарот изнесувала 1.500 денари.
„Затоа беше донесена одлука за цена од 1.500 денари, бидејќи во тој момент цената која беше јавно дадена од приватни здравствени установи изнесуваше 1.500 денари“, изјави Дончев.
Тој уште еднаш појасни дека ФЗО имал воспоставено цена по т.н. ДРГ-методологија уште во 2013 година, која била историска, за правење ПСР односно молекуларни тестови која изнесувала 5.500 денари. Меѓутоа, во изминатиот период само една или две јавни здравствени установи располагале со таков вид технологија и тестови и во услови кога потребата од такви тестови била значително помала односно пред да настапи пандемијата со КОВИД-19.
„Нормално е кога се прават значително помал број тестови, трошоците се фиксни, а варијабилните трошоци се помали зашто нема обем на тестирање и затоа цената беше утврдена на 5.500 денари. Од кога се соочивме со КОВИД-19, ја поставивме ДРГ-цената и таа важи за сите кои склучуваат договор со Фондот, без разлика дали се работи за јавна или за приватна здравствена установа“, рече Дончев.
Во однос на извештајот на Комисијата на Министерството за здравство кои установи ги исполнуваат условите за правење тестови на КОВИД-19, директорот на ФЗО одговори дека покрај Клиниката Жан Митрев,, уште четири други приватни здравствени установи е утврдено дека ги исполнуват условите за простор, опрема и кадар за правење тестирање по ПСР-методолгија за КОВИД-19.
Тоа се приватната лабораторија Авицена, лабореаторијата во болницата Аџибадем Систина, Жан Митрев клиника и Биотек. Сите тие се признати само за ПСР тестови за дијагностицирање на КОВИД-19.
Како што објави НОВА Фондот за здравствено осигурување ја повлече донесената одлука за референтна цена од 3600 денари и донесе нова одлука со која новата цена на ПСР тестирање за КОВИД-19 ќе изнесува 1500 денари. Одлуката е донесена на Управен Одбор и во моментов се чека согласност од Министерот за здравство Венко Филипче, по што ќе биде објавена во Службен Весник.
Во исто време, кога Фондот ја намали цената на ПСР тестовите во јавното здравство, приватните лаборатории драстично ги зголемија цените на овие тестови.
Така на пример, цената во лабораторијата на Биотек и во болницата на Жан Митрев, од 1500 денари во март, сега се зголемени на 3950 денари. Цената не е зголемена само во приватната болница Аџибадем Систина.