Кога зборуваме за поплава која ќе направи штета врз населението и врз инфраструктурата, Скопје е градот од најголем ризик.
Марија Тодоровска
Циклонот „Борис“ донесе обилни дождови и силни ветришта, предизвика поплави во делови од Централна и Источна Европа, особено во Чешка, Полска и Австрија. Илјадници се евакуирани, а расте и бројот на жртви. На фотографии и видеа можат да се видат поплавени куќи, цели населби, а ни малку пријатни не се сцените од браните низ кои се прелева вода. Сето ова го разбуди стравот од доаѓање на циклонот и кај нас. Од УХМР најавуваат дека веќе од среда врнежите ќе бидат пообилни, повремено и поројни.
„Борис“ ја поплави централна Европа, закана има и за регионов и за нашата земја
Колку нашата земја под ризик од поплави, и каде би била најголемата штета доколку дојде до поплава ни објасни професорот Иван Минчев од Шумарскиот факултет.
„Генерално, цела Македонија е под ризик од поплави. Под ризик од поплави се сите македонски котлини. На картата подолу ризичните подрачја се означени со сина боја“, појаснува професор Минчев.
„Меѓутоа, треба да разликуваме речни и поројни поплави. Речните, означени на картата горе, подразбираат надоаѓање на големите водотеци и излевање на истите од нивните корита и плавење на рамните површини, на котлините“, вели професорот.
„Поројните поплави подразбираат поплави на мали планински реки (со стрмен тек), уште почесто суводолици (поточиња кои низ поголемиот дел од годината се суви или имаат многу малце вода), и при пороен дожд за многу кратко време ја пренесуваат водата и не само вода туку и голем обем на наносен материјал (камења, земја, карпи големи дури, ѓубре, градежен отпад – што е голем проблем со повеќето села бидејќи го фрлаат отпадот над село во река или суводолица).“, објаснува професорот Минчев.
Професор Минчев за НОВА ја презентира и картата на локации на потенцијални поројни поплави од 1950-та па наваму.
Скопје е градот со најголем ризик од поплави
Според неа, може да се забележи дека како посебно ризичен терен од поплави доминира Шара Планина бидејќи е подрачје со многу стрмни падини од алпски тип.
Но кога зборуваме за поплава која ќе направи штета врз населението и врз инфраструктурата, Скопје е градот од најголем ризик.
Во таа насока професор Минчев апелира се запре со урбанизација на Водно и приоритетно да се зачува шумата како природна брана од надојдени водотеци.
Професор Минчев потсетува и дека во минатото Водно беше пошумувано токму поради заштита од ерозија и поплави.
„Кога зборуваме за ризик, тоа подразбира веројатност на случување на некоја појава, во случајов за поплави. Оттука, многу е важно да се превенира тоа што загрозува луѓе и инфраструктура и од тој аспект, логички, Скопје е најзагрозено бидејќи целата критична инфраструктура и густината на населбите се тука.
Оттука, се наметнува и заклучокот да се запре со урбанизација на Водно и да се посветува поголемо внимание за чување и обнова на шумата. Ова истото може да реплицира и за другите градови иако во помал обем бидејќи во другите региони урбанизацијата не е толку нагласена како што е случајот со Скопје и со Водно, истакнува професор Минчев.