Винарската визба „Повардарие“ ги има исплатено сите долгови кон лозарите и решението го има добиено во понеделникот потпишано од министерот Михаил Цветков. Оние лозари кои не се исплатени е поради тоа што грозјето го давале преку прекупци а не директно со винаријата.
Ова го соопшти на денешната прес-конференција Министерот за земјоделство шумарство и водостопанство, на која говореше за откупот на сортата вранец, кој се одвиваше со потешкотии деновиве во Тивкешкиот регион.
Одговарајќи пак, на новинарско прашање дали имаат направено проценка за тоа колку грозје не е откупено и лозарите претрпеле штета, Цветков вели, засега немаат официјални бројки, но дека разговарал со винариите, и одлучиле доколку во иднина има оштетен род, истиот да се преработи во дестилат.
Во улога на “медијатор“ помеѓу лозарите и винариите, Цветков апелира тие да прават меѓусебен договор за тоа кога се предаде грозјето во винариите за да не дојде до негова берба и потоа да скапи, со оглед на тоа што винариите имаат одреден капацитет.
– Имајќи ги во предвид проблемите од дождот, дојде до едно хаотично берење на грозјето, а винариите имаат одреден капацитет со кој дневно можеа да примаат (грозје), практично винариите не можеа да го преработат. Од тие причини апелирам да лозарите и винариите се договорат кога да го берат грозјето, бидејќи винариите имаат различен капацитет. Кога ќе го собереме капацитет на сите винарии и грозјето оберено во еден ден, праткично тие (винариите) не можат да го преработат.Од тие причини потребен е договор, изјави Цветков.
Тој денеска најави дека државата ќе субвенционира по три денари за килограм откупено винско грозје во 2016 година, за количини кои се над 60 проценти, но не повеќе од 130 отсто во споредба со ланските откупени количини од сортата „вранец“.
Оваа мерка доаѓа откако винариите го информирале дека ќе го намалат откуп на грозјето бидејќи, како што истакнале, на европскиот пазар била понудена пониска цена поради големиот наплив на вина од многу замји.
Според министерот, се предвидува да се откупат околу 30 до 35 милиони килограми „вранец“.
Цветков информираше дека до вчера откупени се над 43 милиони килограми грозје од кои 26 милиони се од сортата вранец, а останатите се други видови грозје.