Новинарот на Фокус, Никола Младенов, загинал во класична сообраќајна несреќа и нема докази дека во настанот учествувало друго возило или други лица.
Ова го утврдил истражниот судија во предистражната постапка заснована на обдукцијата на Институтот за судска медицина, крим-техничкото и сообраќајното вештачење на МВР, како и фотодокументацијата и скицата на која е претставено движењето на возилото.
Младенов возел со брзина од 160 километри на час, немал ставено сигурносен појас, а во едната рака држел цигара, се вели во обдукцискиот наод.
Судот соопштува дека поради тоа изгубил контрола над возилото и излетал од патот. Причина за смртта е прекин на работата на аортата.
Најинтригантен податок во оваа истрага е прашањето за мобилниот телефон на Малденов, за којшто портпаролот на Кривичкиот суд Владимир Туфегџиќ за НОВА, рече не е предмет на анализа.
За листинзите од разговорите на мобилниот Туфегџиќ рече дека не е информиран.
За материјалните докази односно наплатните билети од парините пронајдени од новинарите од Нова Македонија – нема заклучок.
Изворите на НОВА, потврдуваат дека истрагата не контактирала со никој близок од семејството на Младенов, ниту пак со неговите најблиски соработници.
За деловите од возилото пронајдени на местото на сообраќајката кои беа предмет на истрага е заклучлено дека десниот преден фар потекнува од јануари 2012 од сообраќајка со друго возило. Трагите од левата банкина, пак потекнуваат од сообраќајка од 2010 на возило марка „Нисан“; бојата на десната страна на колата не е од автомобилска боја, туку антикорозивен материјал, објаснува за НОВА, Туфегџиќ.
Сите документи се препратени до Јавниот обвинител и тој ќе донесе одлука дали ќе биде покрената истрага или ќе бидат превземени други дејствија.