Новинарите сами да истражеле кој стои зад брифинзите од судии дадени за одредени новинари и медиуми во кои се презентираа документи од доказната постапка во случајот „Ликвидација“,а од кои Основниот суд 1 подоцна писмено се огради. Ова е пораката на претседателот на Основниот суд 1, Владимир Панчевски добиена како одговор на прашање на НОВА.
На прашањето дали Основниот суд води некаква истрага околу тоа кои се неименуваните извори во судот кои им ги дале документите на одредени новинари во време кога пресудата се уште не е јавно објавена, од таму ни одговорија дека документите не им биле достапни на судиите, а тоа дека се достапни не било факт туку „тврдење на медиумите“.
„Не напишаната пресуда најодговорно тврдиме дека не била достапна на неименувани судии и неповикани лица, а тоа дека била достапна го тврдат новинарски извори од новинарски извештаи, кои ги објавија ваквите невистини. Кој ќе покрене одговорност за судиите и судските извори е реторичко прашање кое навинарите треба да си го постават сами на себе, бидејќи новинарите ја презентираа тезата „од судии и судски извори“, пишува во одговорот потпишан лично од претседателот на Судот до НОВА.
Судот уште ги повикува новинарите тие да истражеле од каде „протекле“ документите.
„Ги охрабруваме сите новинари како коректив на системот да откријат кој стои зад новинарските извори, бидејќи Вие медиумите го објавивте тоа“, порачува претседателот .
Ден по пресудата за новинарот Томислав Кежаровски со која му беше изречена казна затвор од 4,5 години, а која домашни и странски меѓународни организации ја оценија како скандалозна, во одредени медиуми кои важат за блиски до власта се појавија текстови кои содржеа документи и информации со кои судот образложува зошто пресудата е таква. Во своите текстови, медиумите се повикуваа на одржан брифинг од страна на неименувани судски извори.
Откако во јавноста се крена прашина околу прашањето кои се тие судски извори кои презентираат докази пред селективно избрани новинари на се уште ненапишана и објавена пресуда, Судот се појави со соопштение во кое се огради од истите.
Судот и претходно имаше писмени преписки во кои вербално се пресметуваше со новинарите кои бараа Кежаровски да се брани од слобода и кои подоцна реагираа на висината на казната која му беше пресудена. По тие соопштенија под кои единствено беше потпишана Канцеларијата за односи со јавност на судот, настана смена на судскиот портпарол Владимир Туфегчиќ.
Во јавноста се шпекулираше дека смената настанала токму како резултат на соопштенијата на Судот, како и тајниот брифинг со неименувани судски извори. НОВА праша дали овие две работи се поврзани, по што ни беше одговорено дека смената е ротациска и нема врска со работата на судијата кој ја извршуваше и функцијата портпарол.
-Сите соопштенија беа одобрени од претседателот на Кривичниот суд Панчевски. Се што се прави е со негова дозвола. Смената на Туфегџиќ е чисто ротациска и нема никаква врска со писмените реакции на судот, велат за НОВА соработниците од службата за односи со јавност во Кривичниот суд.
Новинарот Саше Димовски кој долги години ги следи состојбите во судството вели дека ваквиот одговор на судот го наоѓа, во најмала рака, за чуден.
„Не може да стане за никаква наводна ротациона смена како што трвди судот бидејќи судијата беше портпарол откако Лидија Неделкова стана претседател на тој суд што значи повеќе од 5 години беше на таа функција, па ако се прифати тврдењето за ротација на судот тогаш нека кажат на колку години ротираат. Јас сум убеден дека смената на Туфегџиќ мора да има врска со последниот брифинг во кој што судот мораше да се огради од своите внатрешни извори“, вели Димовски.
Кој е Владимир Панчевски
Судијата Владимир Панчевски беше поставен за претседател на Основниот суд 1 во Јули минатата година. Пред доаѓањето во Кривичниот суд, тој работи во Министерството за финансии во одделот на финансиската полиција. Во Кривичниот суд доаѓа во 2008 година на позицијата истражен судија. Откако Лидија Неделкова е назначена за претседателка на Судот тој истата година во 2009 е прераспореден во Одделот за организиран криминал. Работел на некои од „жешките“ процеси како „Армиско оружје“.