Пронајдените докази на местото на несреќата на Никола Младенов од страна на новинарите на “Нова Македонија” и од Јадранка Костова, главната уредничка на “Фокус”, треба да се достават до надлежните институции: јавен обвинител, МВР или до истражен судија и подоцна ќе биде одлучено дали тие докази се релевантни и влијаат врз истрагата, изјави за НОВА портпаролот на Кривичниот суд судијата Владимир Туфегџиќ.
После цела недела, се уште нема резултати од истрагата за новинарот и сопственик на Фокус, Никола Младенов- ниту резултати од обдукцијата, ниту пак од вештачењето на возилото. Сепак, Туфегџиќ одбива да коментира како е можно доказите да бидат оставени на местото на несреќата и додава дека истражниот судија постапил согласно законот- го известил јавниот обвинител и ги дал потребните наредби – за вештачење на возилото и обдукција и вели дека тие резултати се очекува да стигнат најитно до истражниот судија, после што тој ќе донесе одлука дали треба да се преземат дополнителни мерки и истрага. Во овој контекст, портпаролот на МВР Иво Котевски за НОВА вели дека во најкус можен рок ќе бидат доставени сите резултати побарани од истражниот судија, но вели дека не смее да коментира кои точно истражни дејствија се вршат во моментов во МВР, затоа што за сите постапки и коментари е надлежен исклучиво истражниот судија.
Во овој момент не се работи за истражна постапка, туку за предистражна, за што единствен надлежен е јавниот обвинител- според неговата одлука постапката може да биде пренасочена во истрага. Туфегџиќ додава дека загинувањето на Младенов е голема трагедија,” но и за мене тоа е лична трагедија, бидејќи нашето познанство датира уште од младоста”, вели судијата Туфегџиќ за НОВА.
За НОВА вчера даде изјава поранешен висок полициски службеник со долгогодишно искуство во сферата на ваквите истраги. Од него побаравме да ни објасни како треба да изгледа истрага во вакви случаи. На прашањето дали е вообичаено да се оставаат можни докази на местото на несреќата, тој одговори дека во пракса добрата истрага зад себе не смее да остави ниту лични предмети, ниту, пак, делови од автомобилот кои би можеле да бидат клучни во истрагата и без кои не би можело да се направи квалитетно вештачење.
-Секој пронајден предмет се означува, документира и се обезбедува. За овој тип на сообраќајка вообичаено се собира се што е на терен, а особено се значајни деловите на возилото бидејќи за да биде квалитетно вештачењето потребни се сите коцки во мозаикот. Единствено можеби некоја ситница како парче од скршен трепкач може да се сликне и да се остави. Значи зборуваме за ситници. Личните предмети, без разлика дали се тоа мастики, ливчиња, весници и слично, во секој случај мора да се соберат, вели нашиот соговорник кој сакаше да остане анонимен.
-Кога се прави увид на отворено мора да се биде многу внимателен. Прво тргнува една група и собира се пред себе, а потоа и уште една во случај првата група да направила превид и да испуштила нешто.
КАКО ТРЕБА ДА ИЗГЛЕДА ИСТРАГАТА од прилогот на Сашка Цветковска